Kryeministri Edi Rama në cilësinë e kryesuesit të radhës së OSBE-së, ka zhvilluar një bisedë telefonike me ministrin e Jashtëm rus, Sergi Lavrov.

Sipas burimeve të Top News mësohet se biseda telefonike mes Ramës dhe Lavrov ka zgjatur 30 minuta dhe në fokus ka qenë zgjidhja e krizës në Bjellorusi.

Po të njëjtat burime kanë theksuar se nga telefonata mes tyre, Lavrov i ka bërë të ditur se presidenti Putin ka qenë dakord me propozimin e bërë që rolin e ndërmjetësuesit për krizën ta marrë OSBE-ja.

Këshilli Europian dhe Presidenti i saj Charles Michel ka pranuar propozimin e kryeministrit Rama në cilësinë e kreut të OSBE  për të zhvilluar një takim me presidentin bjellorus Lukashenko dhe lideren e opozitës SvetlanaTikhanovkaya.

“Ne do të vazhdojmë ta ndjekim situatën nga afër dhe do të jemi të gatshëm të kontribuojmë në përpjekjet për t’i dhënë fund krizës në mënyrë paqësore. BE mbështet plotësisht propozimet e OSBE-së për dialog në Bjellorusi dhe është e gatshme të ofrojë ndihmë për t’i përmirësuar ato”, thuhet në pikën 8 të deklaratës së Këshillit Europian.

Qëndrimi dhe opsioni i kryeministri Rama për zgjidhjen e krizës u mbështet edhe nga presidentja e KE-së. Më herët kryeministri Rama në një postim në rrjetet sociale njoftoi se ishte vënë në lëvizje për krijimin e kanaleve të bisedimeve për zgjidhjen e krizës në Bjellorusi.