Ushqyerja e qenve të saj, Policisë së Kosovës për një ditë do t`i kushtojë 796 euro në ditë apo hiç më pak se 23 mijë e 880 euro për një muaj.
Kaq është vlera e kontratës 30 ditëshe që ky autoritet e nënshkroi me “Eu1 Servis”, kompaninë të cilën e shpërbleu me tender më 15 korrik të këtij viti.
Operatori ekonomik “Eu1 Servis” u përzgjodh si fitues për të sjell ushqim të terur për qentë në sasi prej 12 mijë kg, meqë ofertoi me çmimin më të lirë në mesin e pesë bizneseve sa konkurruan për këtë aktivitet prokurimi.
“Eu1 Servis” ofertoi me një çmim prej 23 mijë e 880 euro. Konkurrentët e saj, të cilët i mposhti, nxorën çmime më të larta.
“Crazy Pet” – 29880 euro, “Agrium” 44760 euro, “GeoGroup” 29400, “Ajani dhe Adami” 45000.
Njëra nga këto kompani u ankua për rezultatin final, andaj kërkoi që Policia e Kosovës t`i përmirësonte disa specifika të tenderit, që pretendonte si bien ndesh me ligjin, saktësisht nenin 6 që flet për ekonomicitetin dhe efikasitetin.
Autoriteti kontraktues, në këtë rast PK, e hodhi poshtë atë.
“Bazuar ne aktivitetet tona mbi 20 vite të përvojës me QZ ne asnjëherë deri me tani nuk kemi pasur probleme te natyrave të cilat kompania në fjalë i ka specifiku në kërkesën e saj. Ndërsa kur bëhet fjalë për Nenin 6 te Ekonomiciteti dhe efikasiteti te LPP-së në të cilën thirret kompania, kostoja e kësaj formule të cilën e ka Ofrua OE ka kosto shumë të lartë në treg, ndërsa ne si njësi kërkuese e kemi vënë këtë formule që i përmbanë dhe i përmbushë vlerat ushqyese të nevojshme për QZ të njësisë dhe ka kosto më të ultë në treg”, thuhet në përgjigjen e Policisë ndaj OE.
Autoriteti i rendit shprehet i bindur se ka kërkuar ushqimin e nevojshëm për qentë “policorë”.
“Ushqimi te cilën ne e kemi kërkuar është i destinuar për qenë të rritur (prej 1 deri 7 vjeç) proteinat dhe yndyrat janë indikatorët qe e kategorizojnë kualitetin i cili varion sipas formulës dhe sasisë se vlerave ushqyese te nevojshme për qentë zyrtar”, thuhet tutje nga PK.
Policia e Kosovës kishte zotuar afër 50 mijë euro për këtë tender.
Qentë e këtij institucioni menaxhohen nga një njësit i quajtur “K-9”, i cili karakterizohet me qen të trajnuar në mënyrë profesionale, e që ka për qëllim luftimin e krimit dhe terrorizmit.
Ky njësit operon në gjithë territorin e Republikës për intervenime të caktuara.
Njësiti “K-9” është themeluar nga viti 2002 dhe i certifikuar një vit më vonë, fillimisht kishte vetëm 7 qen, të cilët ishin të trajnuar nga instruktorë të UNMIK-ut.
Qentë i takojnë racave të ndryshme dhe janë të trajnuar në zbulimin e lëndëve narkotike, mjeteve të dyshuara eksplozive, armëve dhe të jenë të aftë të patrullojnë, gjurmojnë dhe të kapin persona të dyshuar.
