Propozim aktakuzat ndaj Thaçit e Veselit pritet të ngadalësojnë dialogun me Serbinë

Lajme

Propozim aktakuzat ndaj Thaçit e Veselit pritet të ngadalësojnë dialogun me Serbinë

FrontOnline

04 Korrik 2020

Dialogu mes Kosovës dhe Serbisë pritet të ngadalësohet në tentim të arritjes së një marrëveshje finale. Propozim aktakuza për krime lufte ndaj presidentit, Hashim Thaçi dhe kryetarit të PDK-së, Kadri Veseli po konsiderohet se ka ndryshuar procesin dhe vet efikasitetin e dialogut.

Ani pse kryeministri, Avdullah Hoti po vazhdon të përsërisë se dialogu shumë shpejtë pritet të rifillojë, analisti politik, Ramush Tahiri thotë për KosovaPress, se dialogu është ndërprerë të paktën për 1 vit.

Sipas tij, kryeministri Hoti nuk e ka legjitimitetin e përfaqësimit e as legalitetin, pas tërheqjes së mundshme të presidentit Thaçi prej delegacionit kosovar.

“Dialogu është ndërprerë për 1 vit, për këtë jam shumë i sigurt. Kosova s’ka nevojë të shkojë në dialog… Kosova nuk do të shkon në takimin me Makronin në korrik sepse nuk ka autoritet me të cilin bisedon. Kosova mund të shkon nëse gjyqtari e heq propozim aktakuzën ndaj presidentit me arsyetimin që thash sepse përgjegjësia komanduese e UÇK-së nuk është në këtë nivel. Në nivel të shtabit dhe anëtarë tjerë që si kanë përmend, por nënkuptohet. Avdullah Hoti si e tha mirë edhe Isa Mustafa nuk mund të shkojë në bisedime me përfaqësu Kosovën si kryeministër nëse ia kanë heq presidentitin në këtë formë dhe këtë mënyrë. Se ka as legjitimitetin e përfaqësimit e as legalitetin”, thotë ai.

Ndërsa, analisti tjetër politik, Besnik Vasolli thotë për KosovaPress, se dialogu nuk mund të stopohet, por rrethanat e reja politike do të ngadalësojnë dialogun me Serbinë.

“ Me stopuar është fjalë e madhe, por sigurisht do të ngadalësojë të themi më së paku. Në Kosovë tani duhet të ketë një konsensus, që është dashur edhe më herët të kemi, por tani jemi edhe më shpërndarë të them ashtu në këtë temë. Dialogu nuk ka alternativë, duhet të vazhdojmë me dialogim, por para se të rifillojmë dialogun duhet të shikojmë brenda neve se çfarë dëshirojmë të arrijmë, çka dëshirojmë të arrijmë dhe si të negociojmë”, thotë ai.

E sipas drejtorit të institutit “Epik”, Demush Shasha dialogu me Serbinë nuk duhet të vazhdojë në asnjë formë pa pasur një përkrahje të gjerë prej 2/3 në Kuvendin e Kosovës.

Shasha: Dialogu nuk duhet të vazhdojë me Serbinë në asnjë formë përderisa mungojnë një përkrahje e gjerë politike në Kuvendin e Kosovës

“Konsiderojë që dialogu nuk duhet të vazhdojë me Serbinë̈ në asnjë formë përderisa mungojnë një përkrahje e gjerë politike në Kuvendin e Kosovës prej 2 siç kërkohet në bazë të nenin 18.1 të Kushtetutës së Kosovës. Është e pamundshme të zhvillohet dialogu me Serbinë në mungesë të një konsensusi politik”, thotë ai.

Për shkak të propozim aktakuzës të Prokurorisë Speciale ndaj presidentit, Hashim Thaçi dhe kryetarit të PDK-së, Kadri Veseli ka dështuar takimi me palën serbe më 27 qershor në Uashingiton. Derisa nuk dihet a do të mbahet Samiti i Parisit për dialogun në javën e tretë të këtij muaji.