Policia e Kosovës thotë se prej kur janë raportuar rastet e para me coronavirus në Kosovë, numri i zyrtarëve policorë të cilët nga fillimi deri më datë 14 qershor kanë rezultuar pozitiv me COVID-19 është 34.

Policia në një përgjigje për Kohën tha se prej tyre, pas trajtimit deri më tani janë shëruar apo kanë rezultuar negativ 25 prej tyre.

Pas një vrasjeje që ndodhu në Vitomiricë të Pejës, ku mbeti e vdekur 17 vjeçarja A.G, pas obduksionit kishte rezultuar pozitive me COVID-19. Ndërkohë, pas rezultimit pozitiv me koronavirus të 17-vjeçares nga Peja, është vetizoluar edhe prokurori i rastit, policët dhe të tjerë që janë marrë me rastin.

“Sa i përket rastit të fundit në rajonin e Pejës, bazuar në rekomandimet mjekësore janë rekomanduar të vetizolohen disa zyrtarë policorë”, thotë policia.

Deri tash në Pejë janë raportuar 91 raste ndërsa në tërë Kosovën, 1615.

Policia e Kosovës, thotë se si institucion i zbatimit të ligjit, bazuar në mandatin e saj ligjor është e obliguar të ndërmerr veprimet e nevojshme operative hetimore në trajtimin e rasteve të natyrave të ndryshme që raportohen në Polici.

“Njëkohësisht Policia e Kosovës (PK), referuar situatës në të cilën gjendemi si dhe referuar vendimeve të institucioneve të Kosovës ndaj pandemisë, mbetet e përkushtuar qe varësisht prej situatës, vlerësimeve dhe rrethanave që mund të paraqiten të vazhdojë angazhimin e saj në realizimin e detyrave dhe përgjegjësive të saja ligjore karshi qytetarëve dhe vendit, çdo herë duke iu referuar zbatimit të ligjit dhe masave të parapara”, thotë PK-ja.