Që nga fillimi i pandemisë Covid-19, Policia e Kosovës është duke punuar me orar të zgjatur. Drejtori i përgjithshëm i Policisë së Kosovës, Rashit Qalaj, ka thënë për Front Online, që orari 12 orësh për Policinë do të vazhdojë varësisht prej situatës epidemiologjike.
“Orari 12 orësh mundëson që të kemi një numër më të madh të personelit në detyrë dhe angazhimi i tyre do të varet kryesisht nga situata epidemiologjike në vend. Mund të them që për momentin do të vazhdojmë që të punojmë me orarin 12-orësh”, ka deklaruar drejtori.
Flet drejtori i Policisë: 200 zyrtarë policorë në luftë me Coronavirusin, 538 në vetizolim
Qalaj konfirmoi për Front Online se 4 mijë zyrtarë policorë që janë të angazhuar për menaxhimin e pandemisë, u paguhen nga 60 orë shtesë, por jo më shumë.
“Është një numër mjaft i madh i policëve të cilët detyrë specifike e kanë menaxhimin e pandemisë. Numri i tyre është 4 mijë ndërsa policisë e tjerë kryejnë detyra të tjera në bazë të vendeve të tyre të punës. Ne e kemi një rregullore një udhëzim me të cilin ne e bëjmë pagesën e disa orëve shtesë, por jo të gjithave. Pra, momentalisht ne paguajmë 60 orë shtesë të çdo polici i cili është i angazhuar në menaxhimin e kësaj pandemie”, ka thënë ai për Front Online.
