Policia kundër trazirave në Serbi u kundërpërgjigj mbrëmë dhe filloi të rrahë disa studentë të Novi Sadit të cilët kanë bllokuar të gjitha hyrjet në Bashkinë e qytetit që nga mesnata dhe disa prej tyre mbetën të lënduar, raporton N1info.

Rreth orës 02:30 është paraqitur Xhandarmëria nga drejtimi i rrugës Strazhilovska dhe bulevardit Mihajlo Pupina. Më pas ata u pozicionuan pranë gardhit të vendosur përpara ndërtesës së bashkisë në rrugën Zharka Zrenjanina.

Studentët mbetën në mes dy grupeve xhandarësh, të cilët po i shtynin nga të dyja anët. Një pjesë mbeti në hyrjen kryesore të ndërtesës.

Një grup tjetër ndërkohë ka bllokuar hyrjen e pasme të asamblesë. Policia e trazirave u shfaq nga drejtimi i oborrit dhe sulmoi studentët, të cilët po bllokonin hyrjen e oborrit, më pas nxorën shkopinjtë dhe filluan t’i rrahin. Disa studentë u lënduan me atë rast, duke përfshirë një studente. Më pas policia filloi t’i shtyjë studentët drejt kordonit të xhandarmërisë. Ata rrahën edhe ata që ishin ende në këmbë në hyrjen kryesore të kuvendit. Xhandarmëria përfundimisht e largoi policinë nga përdorimi i mëtejshëm i forcës.

Studentët kanë brohoritur në disa raste “shkoni në Kosovë”. Ata u përpoqën gjithashtu t’i shpjegonin policisë se ishin në të njëjtën anë dhe se nuk kishte nevojë për forcë, dhe iu lutën po ashtu që të hiqnin maskat. Pas disa turmash dhe britmash, situata u qetësua.

Profesorët dhe qytetarët më pas sollën batanije dhe stiropor në mënyrë që studentët të përballonin natën shumë të ftohtë të bllokuar para bashkisë së Novi Sadit.