Policia e Kosovës, ka dalë me një sqarim për media në lidhje me raportimet rreth vrasjes së rëndë që ka ndodhur dje në Mitrovicë.
Nga PK, thonë se raportimet ku potencohet se disa zyrtarë policor të kenë qenë të përfshirë në rastin Vrasje e rëndë Mitrovicë, nuk qëndrojnë, dhe sipas tyre, veprës nuk i ka parapri asnjë rrethanë që ndërlidhet me ndonjë zyrtar policor.
“Policia e Kosovës reagon ndaj këtyre shkrimeve duke sqaruar se: në rastin e veprës penale Vrasje e rëndë të ndodhur sot në Mitrovicë, ku ishin të përfshirë katër persona civil, veprës penale nuk i ka parapri asnjë rrethanë qe ndërlidhet me ndonjë zyrtar policor”, thuhet në njoftim.
Ata tutje, kanë deklaruar se një zyrtar policor është intervistuar pasi që, në kohën kur ka ndodhur ngjarja, ai ishte afër të dyshuarit dhe ishte jashtë detyrës zyrtare.
“Nga hetimet e deritanishme, ngjarja dyshohet të ketë ndodhur pas një zënke çasti ndërmjet të dyshuarit dhe viktimave të rastit. Ndërsa, në mesin e dëshmitarëve është intervistuar edhe një zyrtar policor i cili në kohen e ngjarjes ishte jashtë detyrës zyrtare dhe ndodhej afër personit të dyshuar”, thuhet në këtë komunikatë.
Dje në Mitrovicë, ka mbetur i vdekur një person derisa dy të tjerë janë plagosur, nga një mosmarrëveshje në tregun e gjelbërt.
Dje është raportuar se biznesmeni i njohur Shefki Asllani, është i dyshuari për vrasjen e 27 vjeçarit me inicialet V.F.
Viktima kishte ndërruar jetë në Spitalin Rajonal të Mitrovicës pasi që nuk kishte mundur t’i mbijetojë plagëve.