[wp-story]

Lajme

Podujeva kërkon nga qytetarët të aplikojnë masat mbrojtëse kundër virusit

Podujeva kërkon nga qytetarët të aplikojnë masat mbrojtëse kundër virusit
15:17 | 17 Qershor 2020

Komunarët e Podujevës kanë kërkuar nga qytetarët, zyrtarët e administratës e personelit mjekësor të aplikojnë masat mbrojtëse kundër virusit COVID-19.

Në mbledhjen e Shtabit Emergjent që është mbajtur sot, është thënë se listës së personave të prekur nga ky virus të martën i janë shtuar edhe katër persona nga Komuna e Podujevës. Nënkryetari, Nexhmi Rudari, ka thënë se rastet e reja vijnë si pasojë e mosrespektimit të masave.

“Në takimin e sotëm të Shtabit Emergjent, të cilin e udhëhoqi nënkryetari i Komunës, Nexhmi Rudari, u tha se pas testimeve të kryera në Laboratorin e Mikrobiologjisë Molekulare në IKSHPK të martën kanë rezultuar pozitivë me COVID-19 katër persona nga tri fshatra të komunës së Podujevës. Dy persona, që kanë rezultuar pozitivë me koronavirus janë nga fshati Konushec dhe nga një në fshatrat Dumnicë e Poshtme dhe Gërdoc”, thuhet në njoftimin e Komunës së Podujevës.

Pas konfirmimit të këtyre rasteve janë vizituar nga ekipi mjekësor i triazhimit familjet e të infektuarve dhe është bërë dezinfektimi i shtëpive ku banojnë ata.

“Nënkryetari Rudari tha se pas rasteve të fundit të infektuarve me COVID19, jo vetëm në komunën tonë, vijnë si pasojë e mosrespektimit të rekomandimeve të IKSHPK dhe Ministrisë së Shëndetësisë, për zbatimin e masave mbrojtëse. Gjatë takimit u tha se policia dhe inspektorët komunalë të koordinojnë aktivitetet në teren dhe të kryejnë inspektime të vazhdueshme në lokalet dhe objektet hoteliere dyqane e biznese të ndryshme, në mënyrë që të përcjellin respektimin e masave mbrojtëse, distancën sociale dhe bartjen e maskave”, thuhet tutje në këtë njoftim. “Gjithashtu u kërkua që punëtorët e administratës komunale, punëtorët shëndetësorë dhe të institucioneve të tjera, të respektojnë masat mbrojtëse dhe të pajisen me maska e dezinfektues. Shtabi komunal apelon te qytetarët, që pavarësisht lehtësimit të masave, të vazhdohet me respektimin e rekomandimeve nga IKSHPK-ja dhe MSH-ja, duke aplikuar masat mbrojtëse, shmangien e vizitave dhe tubimeve të panevojshme dhe ruajtjen e distancës sociale”.

Në Komunën e Podujevës deri tash kanë rezultuar pozitivë 23 persona me COVID-19, ku njëri prej tyre ka vdekur duke u regjistruar kështu si viktima e parë në Kosovë. Aktualisht janë 11 raste aktive.

Petrol Company në muajin e shenjtë të Ramazanit, dhuron pako ushqimore per familjet nevojtare në qytetin e Vitisë

Të tjera