Rënia në dashuri është një term i përdorur për të përshkruar një ndjenjë intensive të lidhur me dashurinë. Në psikologji, ky fenomen shoqërohet me një ngushtim të vetëdijes, që mund të çojë në keqkuptim dhe mbivlerësim të personit me të cilin ndihemi të dashuruar.
Megjithatë, shkencëtarët kanë studiuar arsyet pse sjellja jonë ndryshon në mënyrë drastike kur jemi të dashuruar dhe deri në çfarë mund të çojë e gjithë kjo. Ata e lidhin këtë ndryshim të sjelljes me “hormonet e ndryshme të dashurisë”, të tilla si dopamina dhe oksitocina, që ndikojnë në emocionet tona.
Ekziston një term i popullarizuar në psikologji – “hernia e dashurisë”. Shumë çifte shtojnë peshë në fillim të një lidhjeje. Arsyeja për këtë mund të jetë se ata përpiqen të rimbushin energjinë e përdorur nga organizmi ose sepse shkojnë më shpesh në kafene dhe restorante. Shkencëtarët kanë zbuluar se çiftet që shtojnë peshë janë më të kënaqur me marrëdhëniet e tyre.
Megjithatë, jo të gjithë shtojnë peshë. Studimet amerikane kanë treguar se oksitocina redukton urinë dhe rregullon metabolizmin. Pra, fluturat në stomak mund të ndihmojnë në humbjen e peshës.
Femrat përdorin një zë më të thellë kur flasin me partnerin e tyre, ndërsa meshkujt ngrenë tonin e zërit kur flasin me një femër që pëlqejnë. Shkencëtarët thonë se meshkujt dhe femrat përpiqen të përshtatin zërin e tyre me tonin e njëri-tjetrit, sepse duan të jenë sa më të ngjashëm.
Antropologia Helen E. Fisher ka treguar se kur një person është i dashuruar, të njëjtat pjesë të trurit aktivizohen si kur një person është i varur nga kokaina. Kjo është arsyeja pse ne duam të jemi me atë person gjatë gjithë kohës dhe jemi pak të pamend kur nuk është pranë nesh.
Studimet zvicerane kanë treguar se një person i dashuruar fle mesatarisht një orë më pak gjatë natës. Dhe asnjë nga pjesëmarrësit në studim nuk është ndier i lodhur, që do të thotë se cilësia e gjumit nuk është dëmtuar.
Disa studime kanë treguar një lidhje midis ndjenjave romantike dhe perceptimit të dhimbjes. Pjesëmarrësit në eksperiment që ishin të dashuruar tregonin reagim më të dobët ndaj faktorëve të jashtëm. Dhimbja e moderuar u zvogëlua me 40 për qind kur njerëzit shikonin fotografitë e dikujt që donin, kurse dhimbja më e fortë u zvogëlua me 10-15 për qind.
Shkencëtarët e shpjegojnë këtë duke thënë se truri ynë e lidh imazhin e partnerit tonë me një shpërqendrim të këndshëm që e bën dhimbjen më të durueshme, në të njëjtën mënyrë që vepron një analgjetik.
Studiues të tjerë kanë zbuluar se dopamina prodhohet më shpejt kur një person është i dashuruar dhe vepron si një qetësues natyral kundër dhimbjeve. Pra, kur mjekët rekomandojnë që të bëjmë diçka që na pëlqen kur jemi të sëmurë, sugjerimi i tyre në fakt mund të ndihmojë. /Telegrafi/
