Përurohen librat “Ekzekutimi i shqiptarëve nga OZNA  dhe UDB-ja jugosllave 1944 – 1990“ dhe “Keqpërdorimet dhe deformimet  e sigurimit  shtetëror jugosllav në Kosovë 1945 – 1966 “ të Dr. Sabile Keqmezi Basha  

Librat e Sabile Keqmezi – Basha për dhunën deri në pushkatim të shqiptarëve në gjysmën e dytë të shekullit 20-të argumentojnë fakte të vrazhda të sistemit jugosllav në Kosovë.

Libri pasqyron një histori të atdhetarëve gjatë okupimit serb për liri duke përfshirë kuvendet që u mbajtën në Kosovë si dhe grupet dhe organizatat ilegale që vepruan në Kosovë gjatë këtyre viteve.

Është monument i përjetshëm që u dedikohet qindra e mijëra aktivistëve dhe patriotëve shqiptar që e flijuan edhe jetën e tyre për çlirimin e Kosovës.

Përmasa e kësaj tragjedie pas gati një shekulli as nuk është harruar, as nuk është tejkaluar.

Masat represive  që merreshin ndaj popullit shqiptar ishin gjithherë antiligjore dhe plotësisht të pa drejta, por kishin synim të caktuar të tyre frikësimin dhe zhdukjen e popullatës shqiptare nga këto troje të tyre.

Studiuesja Basha në librat e promovuar shpërfaq vrasjen e 45.754 shqiptarëve të cilët e kundërshtuan riokupimin nga Serbia.

Këto faqe të shkruara nuk janë thjeshtë dokumente arkivore, por gjurmë të një populli që kurrë nuk u thye, e që dhimbjen e ktheu në forcë, heshtjen në betim dhe netët e errëta në agime të pashlyeshme.

Vepra të tilla shërbejnë kundër harresës dhe errësirës për kujtesë të historisë së trishtë të personaliteteve të anatemuara shqiptare të kohës deri në flijim nën thundrën e regjimit serbo – jugosllav në gjysmën e dytë të shekullit 20-të./RTK/