Lajme

Përplaset pozita dhe opozita në Kuvendin Komunal të Lipjanit

Përplaset pozita dhe opozita në Kuvendin Komunal të Lipjanit
17:46 | 16 Korrik 2020

Kuvendi Komunal në Lipjan ka mbajtur një mbledhje të jashtëzakonshme të enjten, me qëllim të nxjerrjes së një deklarate të përbashkët, për mbrojtjen e vlerave të luftës së UÇK-së. Ndërkohë, propozimi i opozitës për “miratimin e deklaratës lidhur me veprimin e Zyrës së Prokurorit të Specializuar, për të publikuar njoftimin për një aktakuzë të pakonfirmuar nga gjyqtari i procedurës paraprake” ka nxitur reagime nga pozita me arsyetimin se deklarata e opozitës propozuar KK-së është kopjuar nga një komunë tjetër.

Ndërkohë, kuvendarët nga pozita kanë propozuar një deklaratë tjetër, e cila ndërkohë është miratuar me shumicë të votave.

Por në anën tjetër opozita ka akuzuar kryetarin e komunës, Imri Ahmeti me arsyetimin se shpeshherë po bën shkelje ligjore, duke ndërhyrë në punën e Kuvendit Komunal.

Lulzim Rrustemi, shef i grupit nga radhët e PDK-së ka thënë se shumica e komunave e ka bërë një deklaratë të tillë unike, prandaj edhe opozita e ka marrë si të tillë. Sipas tij, KK-ja në Lipjan nuk duhet të humbë kohë dhe as këtë unitet, për hir të luftës së UÇK-së. Rrustemi e ka bërë me dije se nuk mund ta obligojnë Kryetarin e Komunës që të besojë se opozita e ka qëllimin e mbarë duke mos paragjykuar dhe nuk i bëjnë këto veprime për postime në “Facebook”.

“Kryetari ka shumë adresa, keni media, keni portale dhe reagoni ku të doni, por foltorja e Kuvendit nuk duhet keqpërdorur për “Facebooka” dhe për deklarime të gjithkujt dhe gjithsecilit. Ne jemi këtu për çështje të qytetarëve. Kuvendi dallon me kompetenca nga kryetari i komunës, andaj kryetari shpeshherë bën ndërhyrje të paligjshme në kuvend. Prandaj e ftoj për maturi, kujdes dhe respektim të normave ligjore”, ka thënë midis të tjerash, Rrustemi.

Në anën tjetër Kryetari i Komunës, Imri Ahmeti, midis të tjerash ka thënë se opozita ka kopjuar deklaratën e Kuvendit Komunal të Skenderajt, andaj Kuvendi nuk duhet të kopjojë.

“Unë e kam këtu deklaratën e Skenderajt, vetëm pika e nëntë i është hequr, bile propozimi që ka shkuar në Kuvendin e Skenderajt ka shkuar identik krejt. Në pikën e dytë është hequr fjala e të tjera, ndërkaq prej A deri ZH është kopje e deklaratës së Skenderajt. Nënshkruesit e tjerë jam i bindur se nuk e kanë ditur se është kopjues, andaj unë nuk jam që Kuvendi të bëjë kopjime sepse përfaqësuesit e qytetarëve kanë aq mundësi ta bëjnë një deklaratë vet”, ka thënë Ahmeti.

Ndërkohë, Manush Shamolli, kuvendar nga Nisma Socialdemokrate dhe ish pjestar i UÇK-së, ka thënë se kur bëhet fjalë për luftën nuk duhet të bëhet politikë në Kuvend.

Kredi me afat rekord të shqyrtimit dhe aprovimit

Të tjera