Përjashtimi i FSK-së nga stërvitja ushtarake “Defender 23” është sanksioni i parë që Amerika i vuri Kosovës si rezultat i mosdëgjimit të kërkesave të saj për situatën në Veri.

Ish-komandanti i kësaj trupe, Kadri Kastrati tha për “Front Online” se vendi u godit në pikën më të ndjeshme të vet.

“Amerika e goditi Kosovën aty ku i dhemb më së shumti. Forca e Sigurisë së Kosovës është institucioni më i besueshëm në vend. SHBA na ka ndihmu nga fillimi për krijimin e ushtrisë”, u shpreh Kastrati për “Front Online”.

Kryeministri i Kosovës Albin Kurti e përmbledhi me fjalën fatkeqësi pezullimin e Kosovës nga stërvitjet ushtarake “Defender Europe”.

Gjenerali Kastrati i shpjegoi në detaje pasojat e përjashtimit, teksa tha se ndodhi si pasojë e veprimeve të politikës.

“Ushtarët e Kosovës e kanë humb mundësinë me përfitu nga përvoja e 20 mijë ushtarëve të huaj nga mbi 20 shtete sa kanë qenë pjesë e stërvitjes ushtarake. U humb mundësia për të krijuar ura me shtetet tjera, për të mësuar taktika ushtarake. Ushtria është godit shkaku i politikës. Mendoj që do të duhej të goditej politika e jo Forca”, theksoi tutje Kastrati.

Sanksione tjera s`janë paralajmëruar nga shteti më i fuqishëm në botë, por nëse vijnë nuk do të jenë të lehta në fushën e Ushtrisë.

“Në rast se ndodh, pezullohet shkollimi i ushtarëve, trajnimet, por edhe furnizimi me pajisje ushtarake nga Amerika”, vlerësoi Kastrati.

Kryeministri i Kosovës, Albin Kurti, i mbrojti sërish veprimet e policisë së Kosovës, e cila ndihmoi instalimin e kryetarëve të rinj shqiptarë, përkundër rezistencës së banorëve serbë lokalë.

Presidenti i Francës, Emmanuel Macron, bëri përgjegjëse autoritetet e Kosovës për trazirat në veri të vendit, të cilat, siç tha, janë rritur ndjeshëm, prej se kryetarët e rinj shqiptarë kanë marrë detyrën në komunat me shumicë serbe./Front Online/