Kanë përfunduar punët për renovimin e nënkalimit në Kalabri i cili gjendet përballë Qendrës Klinike Universitare të Kosovës (QKUK).
Kryetari i Komunës së Prishtinës, Shpend Ahmeti ka publikuar fotografi nga renovimi i saj. Ai ka shkruar se arti në hapësirat publike i jep jetë Prishtinës urbane.
“Arti në hapësirat publike i jep jetë Prishtinës urbane e kur aplikohet në hapësirat e nënkalimeve i bën më atrtaktive për të i shfrytëzuar. Tashmë kanë përfunduar të gjitha punimet e renovimit të nënkalimit në Kalabri përballë Qendrës Klinike Universitare, pjesë e projektit të Drejtorisë për Shërbime Publike që filloi vitin e kaluar. Punime për rregullim dhe renovim po bëhen edhe te nënkalimet në Kalabri/Dardania, te Xhamia e Llapit dhe në Bardhosh”, ka shkruar Ahmeti.
Ai ka shkruar edhe se shfrytëzimi i nënkalimeve është i rëndësishëm dhe ndikon në rritjen e sigurisë së këmbësorëve.
“Shfrytëzimi i nënkalimeve është i rëndësishëm dhe ndikon në rritjen e sigurisë të këmbësorëve, sidomos në pjesët e Prishtinës ku kemi qarkullim të madh të trafikut. #prishtina”, ka shkruar Ahmeti.
