Pensionistëve dhe përfituesve të asistencës sociale, nuk do t’iu ndalen pensionet edhe nëse ata nuk lajmërohen për evidentim vetëm edhe dy ditë, përkatësisht deri më 31 dhjetor 2020.
Kjo për shkak të gjendjes me pandeminë Covid-19 dhe shmangies nga daljet e grumbullimet.
Por, nuk dihet nëse do t’u ndalen pensionet nëse nuk lajmërohet deri këtë të enjte, raporton Front Online.
“Pensionistët nuk janë të obliguar të lajmërohen deri më 31.12.2020, dhe nuk ju ndalet pensioni. Pensionistët janë të lajmëruar se nuk janë të obliguar të paraqiten deri më 31.12.2020. Pensionistët që vijnë vullnetarisht me u lajmëruar, jemi të obliguar me i lajmëru”, thuhet në përgjigjen e Ministrisë së Punës dhe Mirëqenjes Sociale për “Front Online”.
Nga kjo Ministri thonë se për veprimet tjera lidhur me lajmërimin e pensionistëve dhe përfituesve të asistencës sociale për evidentim, janë në pritje të një vendimi tjetër nga Qeveria e Kosovës.
“Për veprimet në të ardhmen jemi duke prit vendimet e Qeverisë dhe Ministrisë”, thuhet më tej në përgjigjen e kësaj Ministrie për Front Online.
Megjithatë, nga kjo Ministri me gjasë nuk e kanë lexuar vendimin e fundit të Qeverisë së Kosovës, të datës 22 dhjetor 2020, ku thuhet se duhet t’i lirojë gjithë përfituesit e skemave sociale dhe pensionale nga paraqitja e rregullt në zyrat përkatëse.
“ Ministria e Punës dhe Mirëqenies Sociale, në përputhje me situatën e krijuar dhe sipas rekomandimeve të IKSHPK-së dhe MSH-së, udhëzohet të lirojë të gjithë përfituesit e skemave sociale dhe pensionale që menaxhohen nga MPMS-ja nga paraqitja e rregullt në zyrat përkatëse për qëllime të evidentimit siç kërkohet me ligjet përkatëse”, thuhet në vendimit e para një jave të Qeverisë së Kosovës.
/Front Online/
