Familja Ajvazi e cila po jetonte në kushte të rënda ekonomike, pas raportimit të Front Online, po bëhet me banesë.
Kjo familje që jetën e bënte në një barakë afër stadiumit “Fadil Vokrri” në Prishtinë, falë njerëzve vullnet mirë dhe iniciativës së disa të rinjëve për të mbledhur të holla, tani e tutje do të jetojnë në banesën e tyre në Fushë Kosovë.
Xhylezare Ajvazi, e gëzuar se festën e Bajramit do ta pres në banesën e re, i falënderon të gjithë ata që i dolën në ndihmë.
“Faleminderit prej teje shumë, pasha zotin për djalë jam gëzuar se për veti jo, nesër me vdes unë ku shkon ky, faleminderit shumë në xhenet kanë më shku të gjithë ata që na kanë ndihmuar për banesë. Faleminderit shumë të gjithëve që na kanë ndihmuar, faleminderit shumë prej atyre që kanë dhuruar paret, zoti bereqet iu dhashtë”, tha ajo.
Ajo thotë se asnjëherë nuk e ka menduar se do të bëhej me banesë edhe pse e kishte parë në ëndërr një gjë të tillë.
“Nuk më ka shkuar mendja që një ditë do të largohem, një herë kam pa ëndërr se kishe ka ardhur dikush në vizitë dhe na ka thënë mos merrni asgjë veç hajdeni, një herë kam pa ëndërr se do të largohem nga këtu ma jo”, u shpreh ajo e emocionuar për Front Online.
Egzoni, i cili mblidhte hekura për ta siguruar një jetë më të mirë, thotë se nuk ka besuar se një ditë do të bëhet me banesë të re.
“Po, jam shumë i gëzuar që ma kanë ble banesën, i falënderoj të gjithë që kanë dhanë pare për banesë, Zoti i shpërbleftë të gjithë. Kurrë së kam menduar derisa kanë ardhur me na tregu që kanë me na ble banesën”, tha Egzoni për Front Online.
Front Online kishte raportuar ditë më parë për gjendjen e rëndë në të cilën jetonte kjo familje dy anëtarësh. Menjëherë pas raportimit, me iniciativën e disa të rinjve të udhëhequr nga Blend Zymi dhe Blend Sahiti, u siguruan të hollat, 22 mijë euro, dhe kjo familje festën e Bajramit do ta pres në banesën e tyre në Fushë Kosovë.