Në 10 ditët e fundit në Kosovë ka filluar të rritet numri i rasteve të infektuara me virusin Covid-19, shkruan Front Online.
Prishtina prinë me numrin më të madh të rasteve aktive me këtë virus, me mbi 1 mijë raste raste.
Me rritjen e numrit të të infektuarve, sidomos në Prishtinë, janë paralajmëruar edhe masa tjera shtesë.
Ministri i Shëndetësisë, Armend Zemaj po paralajmëron edhe kufizimin e lëvizjes.
“Do të ndërmarrim të gjitha masat e nevojshme qoftë edhe kufizime nëse paraqitet nevoja dhe nëse ka mosdiciplinë”, ka thënë ai.
Apel për respektim të masave po bën edhe i pari i kryeqytetit, për të mos ardhë deri të karantina.
“Nuk jemi të interesuar për karantinë dhe për ta reduktuar orarin, por kjo varet vetëm nëse ne jemi në koordinim me qytetarët, me idenë që ta ngadalësojmë virusin pak”, ka deklaruar ai.
Paralajmërimet për masa shtesë, sidomos për kufizimet e lëvizjes e karantinën, po i kundërshtojnë qytetarët.
Një qytetare nga Prishtina ka paralajmëruar edhe protesta në rast se merren vendime të tilla.
“Populli do të qohet në protesta. Ne me viruse kemi lindur, me viruse jemi rritur dhe do të vdesim. Kjo për mua nuk është akt normal. Si na ra virusi, ne të mbyllemi të gjithë. Unë jam 62 vjeçare, kemi pasur sëmundje të ndryshme dhe asnjëherë nuk na ka ndodhur kjo gjë”, ka deklaruar ajo për Front Online.
Qytetari Sabri Jerliu thotë se masat e tilla do të shkaktojnë pakënaqësi në vend, si dhe do të rrisin varfërinë.
“Kur e gjithë bota vepron diçka edhe ne duhet. Pakënaqësitë janë shumë të mëdha. Kosova është shteti më i varfër në botë dhe do të bëhet edhe më i varfër nëse mbyllet”, ka thënë ai.
Mbylljen e ka kundërshtuar edhe neuropsikiatri Ferid Agani.
Ai ka thënë për Front Online se qytetarët nuk kanë më kapacitete mentale për ta përballuar një mbyllje të dytë.
“Kjo mbyllje ishte dispoporcionale me kapacitetet mentale të popullatës për përballimin e kësaj situate stresogjene e cila u bë kronike dhe zgjati disa muaj”, ka thënë ai.
E, infektologët në vend nuk kanë sugjeruar mbylljen pavarësisht numrit të madh të të infektuarve.
