Deputetja e Vetëvendosjes, Fitore Pacolli thotë se PDK, LDK e AAK e kanë nënçmuar, shfrytëzuar e vjedhurn mërgatën.
Ajo thotë se ato shtete që e kanë respektuar mërgatën e kanë përfshirë atë në mënyrë aktive në politikat zhvillimore.
Sipas saj për të vënë në funksion potencialin e saj, mërgata duhet të përfshihet dhe angazhohet në përpilimin e politikave zhvillimore dhe strategjike.
“Të gjithë ata që nuk e kanë kuptuar këtë i takojnë së kaluarës. Ndërsa mërgata jonë është motor i së ardhmes”, shkruan Pacolli.
Ky është postimi i saj i plotë:
Qeveritë PDK, LDK dhe AAK e kanë nënçmuar, shfrytëzuar e vjedhur mërgatën tonë.
Shtetet që kanë respektuar e vlerësuar mërgatën e tyre, e kanë përfshirë në mënyrë aktive në politikat zhvillimore dhe e kanë vënë tërë potencialin e saj në funksion të zhvillimit ekonomik dhe inovacionit janë në një nivel tjetër të zhvillimit. Këtu kisha me i përmend dy shembuj konkret Irlandën dhe Izraelin.
Mërgata jonë është aseti më i vlefshëm që ka Kosova. Por për të vënë në funksion tërë potencialin e saj, mërgata duhet të përfshihet dhe angazhohet në përpilimin e politikave zhvillimore dhe strategjike, angazhim direkt në sektorë të rëndësishëm në implementimin e politikave, prioritet në investime dhe bashkë-investime me biznese vendore. E jo duke vjedhur, nënvlerësuar e nënçmuar atë.
Të gjithë ata që nuk e kanë kuptuar këtë i takojnë së kaluarës. Ndërsa mërgata jonë është motor i së ardhmes.