Analisti politik, Rrahman Paçarizi, ka thënë që është e patolerueshme që deputetët, për disa herë, nuk po e kalojnë ligjin për rimëkëmbje ekonomike në Kuvend.

“Është e thjeshtë, sepse është ligj që ka të bëjë me qytetarët dhe ekonominë e vendit në përgjithësi. Nuk është ligj që do t’i siguronte vota një partie, qoftë ajo partia në pushtet. Është ligj me rëndësi për qytetarët. Ata janë orientuar më shumë te 10 përqindëshi i mundësisë së shfrytëzimit të kursimeve nga trusti”.

Paçarizi në Rubikon në Klan Kosova, ka thënë që e “kemi një klasë politike të papërgjegjshme”.

“Kemi një parlament, i cili nuk arrin ta kalojë pesë herë ligjin për rimëkëmbje ekonomike, që është i domosdoshëm në këtë kohë pandemie. Në anën tjetër,  i njëjti kuvend arrin me siguru prani absolute të deputetëve për zgjedhjen e anëtarëve të ndryshëm të bordeve, të agjencive, të avokatit të popullit e të tjerë”.

“Këta deputetë dhe këto  parti politike nuk i përfaqësojnë madje as interesat e partive respektive politike. Orientohen dhe komandohen drejtpërdrejt nga liderët e këtyre partive politike dhe nuk e kanë as një shkallë minimale të integritetit dhe të etikës që duhet ta ketë një deputet; kur bëhet fjalë për një ligj që konsiderohet kaq i rëndësishëm për qytetarët”.

Paçarizi ka thënë që ka pritur nga kryeministri Avdullah Hoti, që të jetë më bashkëpunues në këtë situatë.

“Është një arrogancë e trashëguar. Unë nuk e kam pritur një arrogancë të tillë nga Hoti. Kam menduar që do të jetë më bashkëpunues. E kam parë Hotin ndryshe nga paraardhësit e tij; ende menoj që është ndryshe, por ndoshta se ka fuqinë e mjaftueshme brenda partisë së tij, për t’i çuar proceset  përpara”, ka thënë Paçarizi.

Sipas Paçarizit, edhe opozita duhet të tregohet konstruktive kur bëhet fjalë për ligjin për rimëkëmbje ekonomike.

“Duhet të kalojë ky ligj, pasi duhet një intervenim, sepse nuk mund të lihet kështu ekonomia. Duhet të ketë një qasje më konstruktive sidomos nga PDK-ja, pasi VV-së po i zgjat hatërmbetja me LDK-në”.