Në Lojërat Olimpike të Parisit, më shumë se 40 atletë kanë rezultuar pozitivë për Covid-19 dhe sëmundje të tjera të frymëmarrjes, njoftoi të martën Organizata Botërore e Shëndetësisë.

OBSH thekson se ka një rritje të re globale të rasteve pasi mbulimi i vaksinimit bie.

Virusi që qëndron pas pandemisë është ende në qarkullim, paralajmëroi OBSH, duke deklaruar se vendet duhet të shtrëngojnë sistemet e tyre të reagimit dhe të vaksinojnë më të rrezikuarit, raporton AFP.

Disa atletë të shquar vuajtën nga COVID-19 në Lojërat Olimpike të Parisit, duke përfshirë notarin britanik Adam Peaty, ndërsa atletja australiane Lani Pallister u tërhoq nga gara për medalje pasi u sëmur.

“Covid-19 është ende mes nesh. Virusi po qarkullon në të gjitha vendet,” tha Maria Van Kerkhove, Drejtoreshë e Përgatitjes dhe Parandalimit të Epidemisë dhe Pandemisë në OBSH.

Punëtor mjekësor në pikën e vaksinimit në Beograd gjatë pandemisë së virusit korona, nëntor 2021.

Të dhënat nga 84 vende tregojnë se përqindja e testeve pozitive për virusin SARS-CoV-2, i cili shkakton sëmundjen COVID-19, “është në rritje prej disa javësh”, tha ajo në një konferencë për shtyp të mërkurën.

Maria Van Kerkhove tha se virusi vazhdon të evoluojë dhe të ndryshojë.

“Kjo na vë të gjithëve në rrezik të një virusi potencialisht më të rëndë që mund t’i shpëtojë zbulimit tonë dhe/ose ndërhyrjeve tona mjekësore, përfshirë vaksinimin.”

Agjencia AFP kujton se në mbarë botën shkalla e testeve pozitive është mbi 10 për qind, ndërsa në Evropë shifra është mbi 20 për qind.