Liberalizmi i tregut të energjisë elektrike në Kosovë edhe pse është i përcaktuar me “Ligjin për Energjinë” po kundërshtohet nga përfaqësuesit e bizneseve, pasi që sipas tyre, do të ketë ngritje të çmimit të energjisë në vend.

Lidhur me liberalizimin e tregut të energjisë, ka reaguar edhe ish-kryeministri i Kosovës, Ramush Haradinaj.

Ai ka thënë se rritja e energjisë elektrike për 40 përqind do të ishte goditje për të gjithë qytetarët e Kosovës.

Por, ky liberalizmi sipas njohësit të çështjeve të energjisë, Agron Dida, duhet të bëhet.

“Liberalizimin e tregut e kemi në kuadër të Ligjit për Energjinë, kjo duhet të bëhet, por mënyra si duhet të bëhet duhet të bëhet me kujdes, gjithmonë eliminimi i monopoleve është për të mirë të publikut pasi që i rrëzon çmimet”  tha ai.

Sipas Didës, liberalizmit i tregut të energjisë duhet të bëhet me parimin për lirimin e çmimeve dhe të sigurojë një treg të barabartë të konkurrencës.

“Procesi i liberalizimit duhet të siguroj treg të konkurrencës të barabartë, jo të jetë monopol apo biznes që ka interes, kur të bëhet si duhet liberalizimi, kur të caktohen kushtet atëherë duhet me u liru edhe  çmimet, ky është parimi”, tha ai për Front Online.

Dida tha se Qeveria e Kosovës dhe MZHE-ja, për ta liberalizuar tregun e energjisë duhet ta kenë parasysh interesin e qytetarëve.

Liberalizmi i tregu të energjisë elektrike në Kosovë, është paraparë që të bëhet nga sot, por kjo është shtyrë nga Oda  Ekonomike e Kosovës, Parlamenti dhe Qeveria.

Kështu ka bërë të ditur, kryetari i OEK, Berat Rukiçi.

“Bashkërisht te angazhuar me Parlamentin dhe Qeverinë, për vitin e tretë me radhë, arritëm ta shtyjmë daljen e kompanive kryesore te vendit në treg të “derregulluar” te energjisë elektrike”, ka thënë ai./Front Online/