Pronari i pompës së derivateve ‘V-Petrol’, Valon Azizi, pretendon se prona të cilën e përdor qendra tregtare ‘Albi Mall’ për parking, është pronë e tij.
Për këtë arsye, Azizi ka marrë vendim që ta bllokojë këtë pronë me rrethoja të hekurit, pasi që sipas tij, ‘Albi Mall’ këtë pronë e ka përdorur ilegalisht si parking për nevojat e tyre.
E pas këtyre pretendimeve, Njësia Speciale e policisë së Kosovës, sot në orët e mengjesit ka shkuar në vendin e ngjarjes.
Lidhur me këtë FrontOnline, ka dërguar pyetje në zyren për informim të Policisë së Kosovës, por deri në publikimin e këtij lajmin nuk kanë kthyer përgjigje.
Ndërsa mbrën Valon Azizi, i ka bërë të ditura arsyet se pse e ka rrethuar parkingun me rrethoja të hekurit.
Kjo është shkresa e plotë:
Të nderuar,
1. Une, Valon Azizi, pronar i “Valoni Petrol” sh.p.k., përmes kësaj shkrese, dëshiroj të ju njoftoj dhe përmes juve edhe opinionin, lidhur me veprimet e kundërligjshme nga ana e Prokurores së Shtetit znj. Arbëresha Shala.
2. Çështja ka të bëjë me një raport juridiko-civil të lidhur në mes kompanisë që unë e përfaqësoj, në cilësi të qiradhënësit dhe “Albi Mall” Sh.p.k. në anën tjetër në cilësi të qiramarrësit. Objekt i kësaj kontrate të qiradhënies është sipërfaqja e paluajtshmërisë, pronar i së cilës është kompania ime, e cila shfrytëzohet si parking nga Albi Mall.
3. Duke qenë në një raport juridiko-civil i cili raport është krijuar me anë të kontratës për qiradhënie, unë, në cilësi të qiradhënësit, kam ushtruar të drejtat që më takojnë nga ky raport juridiko-civil, ashtu që kam njoftuar qiramarrësin Albi Mall se e kam shkëputur kontratën pasi që qiramarrësi nuk ka përmbushur detyrimet e tij në bazë të kontratës.
4. Pas njoftimit, unë kam vendosur pengesat brenda sipërfaqes time për të mos lejuar shfrytëzimin e kësaj paluajtshmërie pasi që e drejta për të shfrytëzuar këtë pjesë të paluajtshmërisë është ndërprerë nga ana ime.
5. Pas këtij veprimi, kanë ardhur Policia e Kosovës duke më urdhëruar që të largoj pengesat e vendosura në pronën time. Të njëjtit më kanë thënë se janë duke e zbatuar urdhërin e Prokurorit të Shtetit, mirëpo që një urdhër të tillë me shkrim nuk ma kanë prezantuar. Unë kam refuzuar që t’i bindem një urdhëri të tillë, pasi që nuk kishte urdhër me shkrim.
