Një varkë prej druri e mbushur me 280 njerëz që mbërriti në ishullin Kanarie të El Hierro mendohet të jetë anija më e mbushur me emigrantë që ka arritur në arkipelagun spanjoll pasi ka kaluar rrugën e rrezikshme të Atlantikut nga Afrika perëndimore.

Më shumë se 500 njerëz arritën në El Hierro, pasi kontrabandistët përfituan nga moti më i qetë i vjeshtës për të transportuar njerëzit në Kanarie. Shërbimet e urgjencës raportuan se një tjetër varkë mbërriti me 79 persona, ndërsa 127 të tjerë u shpëtuan nga deti, raporton “Guardian”, transmeton Klankosova.tv.

Shërbimi i shpëtimit detar i Spanjës tha se një nga anijet e saj kishte shoqëruar varkën më të populluar, e cila mbante 268 burra, dy gra dhe 10 fëmijë, në portin e La Restinga.

Txema Santana, një gazetar i specializuar për migracionin dhe ish-këshilltar i qeverisë rajonale të Kanareve, tha se kurrë nuk kishte parë kaq shumë njerëz të mbërrinin me një varkë të vogël të vetme, ose kajuko.

“Gjatë gjithë kohës që e kam ndjekur këtë rrugë nga afër, nuk kam parë kurrë një kajuko me kaq shumë njerëz në bord”, shkroi ai në X, i njohur më parë si Twitter. “Ata ishin shumë me fat që arritën në tokë. Kur shohin se sa larg kanë arritur në hartë, ata nuk do ta besojnë atë”.