Një 15-vjeçare ka mbetur e vrarë dhe një 16-vjeçar ka mbetur i plagosur në një sulm të ndodhur pasditen e djeshme në Hexham të Anglisë. Policia ka arrestuar një tjetër 16-vjeçar, I cili është I dyshuari kryesor për vrasjen.
Policia njoftoi se ka marrë njoftim për ngjarjen pak pas orës 17:00 dhe ka gjetur në vendngjarje dy adoleshentë të plagosur. Të dy u dërguan në spital dhe plagët e vajzës u vlerësuan fillimisht jashtë rrezikut për jetë, por më vonë gjithçka ndryshoi.
“Fatkeqësisht, me gjithë përpjekjet më të mira të stafit të spitalit, vajza vdiq më vonë atë mbrëmje”, thuhet në njoftimin e policisë. “Djali pësoi lëndime të rënda, jo kërcënuese për jetën dhe mbetet në spital. Të dy familjet e tyre po ndihmohen nga oficerë të trajnuar posaçërisht në këtë kohë shkatërruese”.
Policia tha se një djalë 16-vjeçar u arrestua fillimisht si i dyshuar për sulm dhe më pas si i dyshuar për vrasje. Oficerët besonin se “të gjithë të përfshirët e njihnin njëri-tjetrin”.
“Është një tragjedi absolute, qyteti është në tronditje të plotë, të humbasësh një nga fëmijët tanë që ndjek një shkollë të mesme lokale është thjesht e tmerrshme,” tha kryebashkiaku i Hexhamit, Derek Kennedy.
Ai shtoi se qyteti ka një shkallë të ulët krimi dhe u emërua vendi më i lumtur për të jetuar në Britani vitin e kaluar. “Është një komunitet shumë i ngrohtë dhe i dashur, kështu që është gjithmonë më e vështirë për ne kur ndodh një tragjedi si kjo,” shtoi ai./FrontOnline/