Pas lajmit tragjik se gjashtë anëtarë të grupit DNK vdiqën nga një zjarr që shpërtheu në një diskotekë në Maqedoninë e Veriut, mediat maqedonase raportuan se këngëtarja mbështetëse e grupit, Ana Kostadinovska, ishte gjetur e gjallë.
Gjegjësisht, Fokus.mk raportoi se ajo ka mbijetuar dhe është në gjendje stabile, por ende kërkon mbikëqyrje mjekësore.
“Gjendja e Anas tani është stabile, siç arritëm të zbulojmë nga spitali. Ajo është e shtrirë atje me dy kolegë të tjerë”, tha një burim i afërt me muzikantët për Blic.rs.
Gjithashtu, dje u bë e ditur se këngëtari i grupit Vladimir Blazev Panço ka shpëtuar dhe është në respirator.
“Këto janë të gjitha informacionet që kemi marrë deri më tani. Nuk ka asnjë informacion të ri për momentin”, ka shtuar burimi për Blic.rs.
Kujtojmë se 59 persona humbën jetën nga zjarri. Ministria e Punëve të Brendshme të Maqedonisë së Veriut ka konfirmuar se zjarri është shkaktuar nga mjete piroteknike.
Midis 59 viktimave ishin bateristi i DNK, Gorgi Gorgiev, tastieristi Filip Stevanovski, këngëtari Andrej Gjorgjieski, vokalistja mbështetëse Sara Projkovska, ‘beatboxer’-i Martin Atanasovski, kitaristi Aleksander Kolarov, inxhinieri i zërit Igor Velkov dhe fotografi i grupit Aleksandar Efremov./Telegrafi/
