Në Qendrën e Klinikës Universitare të Kosovës po trajtohen mbi 500 pacientë të cilët disa janë të konfirmuar me COVID-19, ndërsa disa të tjerë po dyshohen se janë të prekur nga ky virus.
Anipse pacientët e infektuar me koronavirus në komunat me shumicë serbe në Kosovë rëndom trajtoheshin në Serbi, javën e kaluar një pacient i nacionalitetit serb u trajtua në QKUK.
Këtë e ka bërë të ditur ushtruesi i detyrës së SHSKUK-së, Valbon Krasniqi.
“Javën e kaluar ka qenë edhe një qytetar i nacionalitetit serb duke u trajtuar”, tha Krasniqi.
“Çdo qytetar, banor i Kosovës dhe që në momentin e sëmundjes qëllon në Kosovë, ata do të marrin trajtime kudo që janë”, tha Krasniqi.
Në total, në klinikat e QKUK-së dhe në spitale rajonale po trajtohen 509 pacientë, 300 prej të konfirmuar me koronavirus.
Në klinikat e QKUK-së po trajtohen 233 pacientë. 101 nga ta po marrin trajtim në Klinikën Infektive.
Aktualisht, 14 të infektuar me koronavirus në gjithë vendin janë në gjendje më të rëndë, pasi që janë në respiratorë, 8 prej tyre janë në Klinikën Infektive, ndërsa 6 në spitalet rajonale raporton Gazeta Sinjali.
