Lajme

Një drejtor në Pejë infektohet me koronavirus, Komuna s’ndërmerr masa për izolim të zyrtarëve tjerë

Një drejtor në Pejë infektohet me koronavirus, Komuna s’ndërmerr masa për izolim të zyrtarëve tjerë
19:58 | 10 Korrik 2020

Drejtori komunal i Financave, Jeton Abazaj, është zyrtari i parë jo vetëm në ekzekutivin komunal të Pejës, por edhe në tërë administratën e kësaj komune, që është diagnostikuar me Covid-19.

Ai për Kohën ka konfirmuar se të enjten mbrëma i është komunikuar nga Instituti Kombëtar i Shëndetit Publik rezultati pozitiv i testit.

Abazaj nuk e di se ku është infektuar me virus, pasi thotë se vazhdimisht, gjatë tërë kohës së pandemisë, ka zbatuar masat mbrojtëse, raporton KOHA.

Pas diagnostikimit me Covid-19 të drejtorit të Financave, në Komunën e Pejës nuk janë ndërmarrë masa izolimi ndaj ndonjërit prej zyrtarëve të tjerë, me arsyetimin se drejtori i infektuar maksimalisht është përkujdesur për masat e sigurisë.

Aktualisht në gjithë Komunën e Pejës janë rreth 70 raste aktive me koronavirus.

Derisa në Spitalin e Përgjithshëm të Pejës po trajtohen 40 pacientë me Covid-19.

Me rritjen e numrit të rasteve me koronavirus në Pejë, sipas zëdhënësit të komunës, Naim Sahiti, në Repartin Infektiv janë përmbushur kapacitetet dhe tash pacientët e tjerë janë duke u sistemuar edhe në një hapësirë me hyrje të veçantë në Spitalin e Mushkërive.

Prej fillimit të pandemisë, në këtë komunë janë regjistruar rreth 200 raste të infektimit me Covid-19, prej të cilëve 6 veta kanë vdekur.

Prince Caffe pjesëmarrës në panairin DUBAI EXPO 2021

Të tjera