Front TV

Një ditë para vendosjes së reciprocitetit në targa me Serbinë, a po tërhiqet Qeveria e Kosovës?

Një ditë para vendosjes së reciprocitetit në targa me Serbinë, a po tërhiqet Qeveria e Kosovës?
19:25 | 14 Shtator 2021

Marrëveshja e përkohshme për targa ndërmjet Kosovës dhe Serbisë, përfundon këtë të mërkurë (nesër).

Qeveria ka paralajmëruar se do të marr vendim për vendosjen e reciprocitetit për targa me Serbinë, por një ditë para skadimit të kësaj marrëveshje ekzekutivi ende nuk është deklaruar lidhur me këtë çështje.

Për përfundimin e kësaj marrëveshje, foli zëvendëskryeministri i Kosovës, Besnik Bislimi, me t’u kthyer nga takimi në Bruksel.

“Në takimin ku është diskutuar për targat ne kemi deklaruar se afati përfundon më 15 shtator dhe nuk shohim arsye për vazhdim. Përdorimi i targave ka filluar në prill në vitin 2011 dhe palët pastaj kanë devijuar dhe kanë tentuar ta bëjnë marrëveshje të përhershme. Nevoja që kjo të trajtohet në Bruksel është artificiale”, tha ai.

Pyetjeve të FrontOnline se a do të merr sot Qeveria “Kurti” vendim për vendosjen e reciprocitetit për targa, nuk i janë përgjigjur kabineti i Kurti e as zëvendëskryeministri Bislimi.

Ish-ministri i Brendshëm tregon arsyet e mos vendosjes së reciprocitetit

Por zbatimin e reciprocitetit për targa, nuk po e sheh problematike, ish-ministrit i Punëve të Brendshme të Kosovës, Ekrem Mustafa.

Ai për Front Online, tha se Kosova ka qenë e përgatitur edhe më herët për vendosjen e reciprociteti për targa, por një gjë e tillë nuk ka ndodhur për shkak të shqiptarëve të cilët jetojnë në Preshevë e Bujanoc.

“Këtu ka qenë një shkak që nuk është aprovuar, për shkak të qytetarëve tanë që kemi në Preshevë, Bujanoc, ata e kanë kundërshtuar për shkak se u dëmtoshin financiarisht. Gjatë mandatit tim, ne teknikisht kemi qenë të përgatitur sa i përket zbatimit të marrëveshjes. Mundësitë janë që të zbatohet, ne kemi të drejt dhe nuk dëmtohemi aspak vetëm sa e kushtëzojmë Serbinë me zbatu marrëveshjen. Serbia nuk ka qare pa e zbatuar pasi që në kufi vendosen masat reciproke”, tha ai.

Dedaj: Reciprociteti për targa me Serbinë nuk sjellë humbje

Lidhur me reciprocitetin që pritet të vendoset nga Qeveria e Kosovës për targat ndërmjet Kosovës dhe Serbisë, për FrontOnline, ka folur edhe njohësi i komunikacionit, Nol Dedaj.

Ai tha se pret që me vendosjen e reciprocitetit për targa të përmirësohen edhe  raportet në mes të Kosovës dhe Serbisë.

“Është normale që reciprocitetit të vendoset me çdo shtet nëse ai shtet nuk t’i njeh ty targat dhe po shpresoj se kjo formë e zgjedhjes së problemit të qarkullimit të lirë do të bëhet dhe do të përmirësohet edhe niveli shtetëror në mes të Kosovë dhe Serbisë” tha ai.

Ai tha se me vendosjen e reciprocitetit, Kosova nuk do të ketë humbje.

“Nuk shoh humbje te pala kosovare pasi që regjistrimet e automjeteve duhet me qenë të njohura nga çdo shtet, ne e kemi rastin e shteteve që nuk na kanë njohur por na i njeh tabelat dhe e paguajnë vetëm sigurimin. Pres që vendimi të merret nesër dhe të zbatohet, nuk është punë e vështirë sikurse ata i japin tabelat plotësuese mund t’i japim edhe ne” , tha ai

Ndërsa dy protagonistët e involvuar në proces të dialogut, Edita Tahiri për shumë vjet dhe Skender Hyseni për disa muaj nuk kanë dashur të komentojnë paralajmërimet e Qeverisë së Kosovës për reciprocitet me Serbinë.

“Unë do të flasë kur do të mbahet takimi në nivelin politik”, ka deklaruar ish ministrja për dialog Edita Tahiri , për FrontOnline, pa dashur të flasë fare për paralajmërimin e Qeverisë.

Për këtë temë nuk ka dashur të flasë as ish-koordinatori për dialog, në Qeverinë “Hoti”, Skender Hyseni

Ai ka thënë se nuk komenton derisa të merret vendimi nga Qeveria.

/Front Online/

Loja e madhe ka filluar nga 31 Janar dhe vazhdon deri me 2 Shkurt në Petrol Company

Të tjera