Protestuesit serbë kanë nisur të mblidhen para objekteve komunale në veri të Kosovës edhe të martën.
Ata në këtë formë po kundërshtojnë udhëheqjen e kryetarëve të rinj shqiptarë.
Para tyre e ndërtesave të Komunave në Zveçan, Leposaviq dhe Zubin Potok po qëndron KFOR-i.
Nata në veri të vendit ka kaluar e qetë pas tensioneve të djeshme të krijuara nga grupe serbësh dhe përleshjes së tyre me ushtarët e KFOR-it në Zveçan.
Protestues me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve.
Ata kanë hedhur gjësende të ndryshme në drejtim të paqeruajtësve, derisa kanë dëmtuar vetura të mediave, duke e djegur tërësisht veturën e një televizioni.