Napoli do të arkëtojë 150 milionë euro nga shitjet e Khvicha Kvaratskhelia dhe Victor Osimhen, dhe sipas Corriere dello Sport, Joshua Zirkzee, Edon Zhegrova dhe Georgiy Sudakov janë mes objektivave të Partenopeëve për merkaton e verës.

Napoli zëvendësoi Kvaratskhelia me Noah Okafor gjatë merkatos së janarit, por drejtori Giovanni Manna ka konfirmuar se klubi do të bëjë investime të rëndësishme gjatë verës.

Kvaratskhelia tashmë është transferuar te PSG për 75 milionë euro, po aq sa është klauzola e largimit të Osimhen, e cila do të jetë e vlefshme gjatë verës pas huazimit të tij te Galatasaray.

Më parë, Corriere dello Sport dhe Repubblica raportuan se Napoli kishte refuzuar një ofertë prej 65 milionë euro nga klubi turk për Osimhen gjatë merkatos së dimrit.

Me një buxhet më të madh për transfere, Napoli pritet të sjellë përforcime në fazën sulmuese gjatë verës.

Sipas raportit më të fundit nga Corriere dello Sport, sulmuesi i Manchester United, Joshua Zirkzee, është një nga objektivat e Napolit, ashtu si talenti i Shakhtar Donetsk, Georgiy Sudakov, i cili është lidhur gjithashtu me Barcelona dhe Manchester City.

Përveç tyre, Corriere dello Sport raporton se Edon Zhegrova, Gabri Veiga dhe Allan Saint-Maximin mbeten në radarin e klubit për sezonin e ardhshëm. /GazetaExpress/