Ndonëse ishte paralajmëruar takimi në mes të liderëve të shtetit të Kosovës dhe atyre serb në Washington për 2 shtator, ky takim është shtyrë, për dy ditë më vonë, më 4 shtator, ndërsa deputetët po kërkojnë që paraprakisht kryeministri Avduallah Hoti të raportojë para tyre për atë që do të diskutohet atje.
Një kërkesë të tillë e ka bërë deputetja nga radhët e PDK-së Ariana Musliu Shoshi, e cila i ka kërkuar Hotit që t’i njofton deputetët, duke pasur parasysh se Kosova është demokraci parlamentare dhe se informimi i tyre si deputetët është i rëndësishëm për këtë takim.
“Republika e Kosovës është demokraci parlamentare e përcaktuar me nenin 4 të Kushtetutës. Pikërisht për këtë arsye për ne si deputetë është i rëndësishëm informacioni për këtë takim, sepse cilido diskutim, cilado marrëveshje në fund duhet ta marrë miratimin tonë”,ka shkruar Musliu Shoshi në Facebook.
