Mungesa e kuorumit ka bërë që deputetët e Kuvendit të Kosovës të shkojnë në pauzë prej 15 minuta. Për seancën e sotme janë paraparë dy interpelanca të kryeministrit Avdullah Hoti.
Me 46 deputetë në sallë, Kuvendi nuk ka mundur të vazhdojë punimet, meqë për të votuar një propozim për rendin e ditës, janë dashur 61 deputetë në sallë.
Nënkryetarja e Kuvendit të Kosovës, Arbërie Nagavci bëri të ditur se proceduralisht nuk mund të vazhdohet me 46 deputetë në sallë.
Nagavci: Nuk ka kuorum për vazhdim të seancës
“Nuk ka kuorum zoti kryeministër, janë 44 deputetë dhe proceduralisht nuk mund të vazhdojmë me 44 deputetë, Lëvizja janë këtu por sigurohu shumica thirrni kolegët dhe mund të vazhdojmë”, tha ajo.
Ndërsa, shefi i grupit parlamentar të Lidhjes Demokratike të Kosovës, Arben Gashi i konsideroi tendencioze deklarimet e Nagavcit.
Gashi: Të vazhdojmë interpelancën e kryeministrit
“Po më duket pak tendencioze mënyra si po deklaroni, Lëvizja i ka deputetët thua se nuk ka deputetë të tjerë, pra ka deputet në sallë por janë të pamjaftueshëm me vazhdue seancën, kryesisht janë deputetë të LDK-së dhe vetëvendosjes, ka edhe deputetë të AAK-së, të tjerët mungojnë, kjo është e vërteta. A ka interesim për me vazhdue seancën dhe interpelancën, ideja kryesore është të interpelancat dhe kryeministri është i gatshëm me ju përgjigje interpelancave sepse di duket pasdite ka agjendë tjetër, sepse Kuvendi pa konsultim me kryeministrin ja ka vendosë datën dhe orën e interpelancave”, tha Gashi.
Arbëria Nagavci nga Lëvizja Vetëvendosje propozoi që të shkohet në pauzë, në mënyrë që të arrihet kuorumi i nevojshëm për të proceduar me kërkesën me shkrim që lidhet me rendi ne ditës.
Nagavci: Duhen 61 deputetë të pranishëm në sallë për të votuar pikën që lidhen me rendin e ditës
“46 u bënë tani, janë 46 deputetë, kemi një propozim me shkrim në lidhje me rendin e ditës i cili duhet të votohet përpara se të procedojë me pika të tjera të rendit të ditës, për të votuar atë propozim që ka të bëjë me rendin e ditës, duhet të jemi 61 deputetë të pranishëm në sallë”, tha ajo.
