Ministria e Punëve të Brendshme (MPB) ka konfirmuar se nuk ka arritur të kryej të gjitha procedurat e nevojshme për furnizim me material të mjaftueshëm për letërnjoftim, duke u arsyetuar në rrethanat e krijuara si pasojë e pandemisë COVID-19, raporton portali “Front Online”.

Front Online dje ka raportuar se qytetarët po presin me muaj për t’u pajisur me letërnjoftim, përderisa nuk po marrin asnjë përgjigje konkrete nga Agjencioni i Regjistrimit Civil të Kosovës.

Dështon Ministria e Agim Veliut, s’ka letërnjoftime për qytetarët!

Njoftimi i plotë për medie i MPB-së:

Ministria e Punëve të Brendshme njofton qytetarët e Republikës së Kosovës, se nga rrethanat e krijuara si pasojë e pandemisë COVID-19, Agjencia e Regjistrimit Civil, nuk ka arritur  me kohë të duhur të kryej të gjitha procedurat e nevojshme për furnizim me material të mjaftueshëm për letërnjoftime. Si pasojë, shumë qytetarë të Republikës së Kosovës, të cilët kanë aplikuar për letërnjoftim, fatkeqësisht nuk kanë arritur që të pajisen në kohën e paraparë.

Gjithsesi, Ministria e Puneve të Brendshme ka ndërmarrë të gjitha veprimet e nevojshme që në afat sa më të shkurtër kohor të furnizohet me  material të nevojshëm, në mënyrë që të bëjë të mundur të pajisen me letërnjoftime të gjithë qytetarët e Republikës së Kosovës.

Deri atëherë për kryerjen/marrjen e shërbimeve të nevojshme, mund të përdoret pasaporta valide e Republikës së Kosovës.

Ministria e Punëve të Brendshme shprehë keqardhje për situatën e krijuar dhe kërkon mirëkuptim nga të gjithë qytetarët e Republikës së Kosovës, deri në zgjidhjen e kësaj çështjeje.