Projektligji për Rimëkëmbjen Ekonomike ka kaluar në lexim të dytë sot në Kuvend.

Pro votuan 72 deputetë, asnjë nuk ishte kundër dhe asnjë nuk abstentoi.

I njëjti projektligj, për të hyrë në fuqi duhet së pari shkojë për dekretim te Presidenti e më pas për publikim në Gazetën Zyrtare.

Qëllimi i këtij Projektligji është plotësimi dhe ndryshimi i disa ligjeve, me qëllim të rimëkëmbjes së ekonomisë së Republikës së Kosovës, pas efekteve negative të shkaktuara nga pandemia COVID -19.

Në këtë Projektligji, thuhet se “Fondi Kreditor Garantues i Kosovës, (FKGK) autorizohet të lëshojë garanci kreditore me përqindje të mbulesës nga 50 deri në 80 për qind”.

Fondi Kosovar për Garanci Kreditore është institucion i pavarur dhe i qëndrueshëm, që lëshon garanci institucioneve financiare për të mbuluar rrezikun për kreditë e ndërmarrjeve të vogla dhe të mesme.

Gjithashtu, kontributpaguesit mund t’i tërheqin 10 për qind të kursimeve pensionale në Fondin e Kursimeve Pensionale të Kosovës.

Vlera totale e këtij projektligji është 365 milionë euro.