Tenderi i Ministrisë së Arsimit për ndërtimin e Çerdhes në Komunën e Suharekës në vlerë prej rreth 650 mijë euro është rekomanduar te kthehet në rivlerësim nga eksperti shqyrtues i Organit Shqyrtues të Prokurimit (OSHP) pas ankesës që ka bërë kompania “Construmax”, raporton portali “Front Online”.
Përfaqësuesi i kësaj kompanie, Faton Krasniqi, në seancën e së mërkurës së OSHP-së ka deklaruar se janë pajtuar me ekspertizën për kthimin e lëndës në rivlerësim, pasi që, siç ka thënë ai, konzorciumi i operatorëve të rekomanduar për kontratë nuk ka arritur të dëshmoj që kanë kryer punë të ngjashme në vlerë prej 1.2 milionë euro për tri vitet e fundit.
Poashtu, sipas tij, e njejta nuk ka as marrëveshje të noterizuar mbi dhënien me qira të kamioneve, ndërsa në CV-në e inxhinierit të diplomuar të makinerisë nuk figuron përvoja dy vjeçare, etj.
Ai ka shtuar se Ministria e Arsimit me këtë rast ka bërë shkelje të dispozitave të Ligjit të Prokurimit Publik.
Në anën tjetër, përfaqësuesja e Ministrisë së Arsimit, Arbenita Mehmetaj, ka dhënë se ky institucion ka përzgjedhur grupin e operatorëve ekonomik që i plotëson kriteret e dosjes së tenderit dhe që ka ofruar çmimin më të ulët.
Ndërsa eksperti shqyrtues, Hysni Muhadri, ka thënë se te kërkesa për vlerën e projekteve të realizuara prej 1.2 milionë euro, referencat e ofruara nga operatori i rekomanduar për kontratë nuk i përmbushin kërkesat e dosjes së tenderit. Ndërsa sa i përket CV-së së inxhinierit të makinerisë, kompania ka ofruar referencë të lëshuar nga Korporata Energjetike e Kosovës, e cila e plotëson kërkesën e autoritetit kontraktues.
Vendimi i Panelit Shqyrtues për këtë aktivitet Prokurimit do të merret në ditët në vijim, deri sa portali “Front Online” do t’u mbaj të informuar në vazhdimësi për rrjedhën e këtij procesi të prokurimit.
