Me debate të ashpra është karakterizuar seanca e së mërkurës (dje) e Organit Shqyrtues të Prokurimit (OSHP), ku është shqyrtuar ankesa e operaotëve ekonomik “Botek” dhe “Infosoft Systems” në lidhje me tenderin në vlerë prej 750 mijë euro të Ministrisë së Administratës Publike, përkatësisht Ministrisë së Punëve të Brendshme dhe Administratës Publike, për furnizim me harduer për nevojat e Sistemit Informativ Shëndetësor (SISH), raporton portali “Front Online”.
Tefik Sylejmani nga kompania ankuese “Botek” ka deklaruar me këtë rast se Ministria ka shkelur Ligjin e Prokurimit Publik me vendimin për anulimin e këtij tenderi. Sipas tij, kompania “Botek” në këtë aktivitet të prokurimit ka pasur ofertën më të lirë për 19% nga oferta e dytë, përderisa, siç ka thënë ai, kompania e rekomanduar për kontratë “Infosoft Systems”, nuk ka qenë teknikisht e përgjegjshme në këtë aktivitet të prokurimit.
Sipas tij, Ministria e Administratës Publike ka qenë e detyruar ta bëj rivlerësimin e ofertave konform vendimit të OSHP-së, mirëpo, siç ka thënë ai, jashtëligjshëm ka marrë vendim mbi anulimin e aktivitetit të prokurimit me arsyetime të pabazuara dhe në kundërshtim me Ligjin e Prokurimit Publik dhe Rregulloret në fuqi.
Në anën tjetër, Ilir Shehu nga kompania “Infosoft Systems”, kompani kjo që ishte rekomanduar për kontratë, ka deklaruar se e mbështesin raportin e ekspertit shqyrtues të OSHP-së, i cili ka rekomanduar që ankesat e operatorëve ekonomik të pranohen si pjesërisht të bazuara dhe lënda të kthehet në rivlerësim.
Në anën tjetër, përfaqësuesi i Ministrisë së Administratës Publike, Kujtim Gashi, ka deklaruar në seancën e OSHP-së se buxheti për këtë projekt ka qenë i paraparë vetëm për vitin 2019, ndërsa, sipas tij, nuk ka kod të veçant buxhetor për vitin 2020.
“Ky projekt ka qenë për Ministrinë e Shëndetësisë. Për vitin 2019 ka qenë buxheti i paraparë për këtë projekt, por jo edhe për vitin 2020. Unë kam një shkresë nga Ministria e Financave që dëshmon se nuk kemi mjete buxhetore për këtë vit”, ka thënë Gashi.
Sipas tij, pasi që për këtë projekt nuk ka fare kod buxhetor për këtë vit, prandaj nuk e di se si do të nënshkruhet kontrata mes palëve kur nuk ka mjete buxhetore.
Ndërsa eksperti teknik i OSHP-së, Kreshnik Spahiu, ka thënë se anulimi i këtij aktiviteti të prokurimit bie ndesh me nenin 62 të Ligjit të Prokurimit Publik.
“Për më tepër Autoriteti Kontraktues është dashur që një projekt të tillë kapital ta inicioj me kohë. Andaj kemi rekomanduar që ankesat e operatorëve ekonomik ankuees të aprovohen si të bazuara, të anulohet vendimi i Autoritetit Kontraktues për anulimin e aktivitetit të prokurimit dhe rekomandojmë që lënda të kthehet në rivlerësim”, ka theksuar Spahiu.
Vendimi i Panelit Shqyrtues për këtë aktivitet Prokurimit do të merret në ditët në vijim, deri sa portali “Front Online” do t’u mbaj të informuar në vazhdimësi për rrjedhën e këtij procesi të prokurimit.
