Vetëm gjatë ditës së sotme Ministri Arben Vitia ka zhvilluar dy takime të ndara me ambasadorë të shteteve mike në Kosovë, atë të Luksemburgut dhe të Izraelit.
Kryefjalë e takimeve ishte mundësia e shtimit të investimeve në projektet që do ta transformojnë sektorin publik të shëndetësisë.
Të njëjtën gjë Ministri Vitia e kërkoi edhe në takim me ambasadorin e Finlandës. E, pjesa e takimeve po del të jetë veç një prej angazhimeve të shumta ditore.
Javën e kaluar ministri Vitia ishte më i koncentruar në kërkimin e përgjegjësisë. Si rezultat, dy drejtorë të rëndësishëm në SHSKUK dhanë dorëheqje brenda dy ditëve.
Ministria e Shëndetësisë nuk u ndal me kaq. Në Qeverinë e Kosovës dërgoi më miratim Projektligji për Shëndetin Riprodhues dhe Fertilizimin e Asistuar Mjekësor që do të mundësoj ofrimin e këtyre shërbimeve edhe në institucionet publike shëndetësore në Kosovë.
Në emisionin “Context”/ATV, ministri Vitia paralajmëroi se deri në fund të muajit të ardhshëm pritet të dërgohet në Qeveri edhe projektligji për barna, i cili synon që të rregullojë çmimin e barnave në treg. Ai tha se përmes ligjit synohet që çmimi i barnave të jetë uniformë në të gjitha barnatoret në vend.
Ndërkohë, nuk munguan as përkrahjet për komunat e Kosovës, në mesin e të cilave edhe Komuna e Prishtinës për të cilën Ministria e Shëndetësisë ndau gjysmë milioni euro vetëm për realizimin e projektit “Vizitat në shtëpi për nënat dhe fëmijët e moshës 0-3 vjeç”. Gjithashtu, për hartimin e Planit Strategjik për zbatimin e fizibilitetit dhe raportit shtesë për studimin “Ngritja e infrastrukturës dhe pajisjeve për kujdesin dytësor dhe tretësor”, sipas njoftimit nga MSH, pritet të ketë një kosto mbi 41 milionë euro.
Kjo është hera e parë që kemi një plan të tillë strategjik për ngritjen e infrastrukturës dhe pajisjeve për kujdesin dytësor dhe tretësor.