Rreth 20 marina kineze dhe tajvaneze janë ende të vendosura pranë linjës qendrore jozyrtare të ngushticës së Tajvanit sot, tha një burim i njohur me çështjen për Reuters.
Disa anije të marinës kineze vazhduan të kryejnë manovra pranë bregut lindor të Tajvanit sot, tha ky burim, sipas agjencisë britanike.
Komanda Lindore e Ushtrisë Çlirimtare Popullore të Kinës njoftoi dje se po vazhdonte stërvitjet e përbashkëta ushtarake në det dhe hapësirën ajrore rreth ishullit të Tajvanit dhe zëdhënësi i Ministrisë së Jashtme kineze Wang Wenbin tha se ato synonin të paralajmëronin Shtetet e Bashkuara dhe t’u jepnin një mësim “tajvanezëve”.
“Masat që kemi marrë janë një përgjigje ndaj vizitës në Tajvan të Kryetares së Dhomës së Përfaqësuesve të SHBA-së, Nancy Pelosi. Përgjigja e Kinës është e justifikuar dhe legjitime dhe shërben si një paralajmërim për nxitësit dhe një mësim për separatistët tajvanezë”, tha Wang, raporton Tanjug.
Ai tha se ekziston vetëm një Kinë, pjesë përbërëse e së cilës është Tajvani.
Ministri i Jashtëm i qeverisë në Taipei, Joseph Wu, tha më parë se Kina përdori vizitën e Pelosit për të nisur manovra ushtarake në shkallë të gjerë pranë Tajvanit, me qëllim ndryshimin e status quo-së në zonën e ngushticës së Tajvanit./FrontOnline/