Drejtoresha e Arsimit në Komunën e Prishtinës njëherit kandidatja për deputete, Jehona Lushaku-Sadriu së bashku me kandidatin për kryeministër nga LDK, Lumir Abdixhikun, vizituan stadiumin ‘Fadil Vokrri’, ku u takuan me tifozët e Kombëtares së Kosovës, Dardanët, ku u diskutua për përmirësimin e sportit në vend.
Me dakordim të plotë me kryetarin e Dardanëve, Lulëzim Berishën, u potencua se organizimi i turneve në shkolla dhe ndërtimi i fushave me bari artificial, janë jetike për zhvillimin e talenteve të reja.
“Si pasionante e sportit dhe arsimit, si dhe kandidate e LDK-së, angazhohem që këto ide të shndërrohen në realitet. Përmes vizionit tonë, do të përqafojmë një qasje gjithëpërfshirëse për arsimin, duke përfshirë më shumë investime në sport dhe infrastrukturë për të rinjtë”, tha Lushaku-Sadriu.
Jehona Lushaku-Sadriu u zotua se do të luftojë për një të ardhme më të mirë për brezat e rinj, që në Kosovë përmes arsimit dhe sportit të ketë më shumë shpresë e besim.
“Unë, jam “9-shi” i ekipit tonë – ashtu si legjenda Fadil Vokrri dikur – dhe do të luftoj për një të ardhme më të mirë për brezat e rinj. Pas 9 shkurtit, së bashku do të ndërtojmë Kosovën me besim, shpresë dhe guxim”, përfundoi ajo.
Kujtojmë, se Jehona Lushaku-Sadriu, garon me numrin 9 në kuadër të listës për deputet nga Lidhja Demokratike e Kosovës, në zgjedhjet që do të mbahen më 9 shkurt.
