Në akademinë mirënjohëse me rastin e 40 vjetorit të Lëvizjes Popullore të Kosovës si dhe 24 vjetorit të kalimit të këshillit të rrethit të Preshevës në formacion ushtarak të UÇK-së u tha se Lugina e Preshevës në asnjë moment nuk ka mundur të bëjë përjashtim në krejt përpjekjet për organizimin e rezistencës dhe luftës për liri e çlirim kombëtar.
Me rastin e 40 vjetorit të Lëvizjes Popullore të Kosovës si dhe 24 vjetorit të kalimit të këshillit të rrethit të Preshevës në formacion ushtarak të UÇK-së në Gjilan është organizuar akademi mirënjohjeje në mbështetje të Luginës së Preshevës.
Bajrush Xhemajli, ish kryetar i Lëvizjes për Çlirim Kombëtar ka thënë se pavarësisht përpjekjeve të pushtetit jugosllavo-komunist, shqiptarët jo vetëm që nuk u gjynjëzuan, por vazhduan rezistencën e tyre nëpërmjet demonstratave gjithëpopullore (1968, 1981, 1988-1991 dhe 1997) dhe lëvizjeve të fshehta të cilat shtrinë veprimtarinë e tyre në të gjitha trevat shqiptare të okupuara si dhe në diasporë.
“Lëvizja shqiptare u fuqizua dhe u shtri vazhdimisht në trojet shqiptare. Padyshim që, grupet e ndryshme e organizatat çlirimtare të njëpanjëshme, me baticat e zbaticat e tyre si aktivitet atdhetar, jo vetëm mbajtën gjallë luftën për liri me dekada por i fuqizuan ato për të kulmuar në organizimin e Ushtrisë Çlirimtare të Kosovës dhe në çlirimin e rreth 11 000 km katrorë”, ka thënë Xhemajli.
Sipas tij, Lugina e Preshevës në asnjë moment nuk ka mundë të bëjë përjashtim në krejt përpjekjet e për organizimin e rezistencës dhe luftës për liri e çlirim kombëtar, që nga pushtimi osman, e deri më sot.
“Lugina e Preshevës ka qenë pjesë e pandashme e Kosovës dhe tejet e rëndësishme në krejt këto përpjekje plotë sakrifica prej më të ndryshmeve e deri në sakrificën sublime të patriotëve që s’u përkulën kurrë. Prandaj edhe i kemi të përbashkëta të gjitha: që nga territori kompakt, e deri te luftërat e përbashkëta ndër shekuj, e veçanërisht të dy luftërat e fundit të UÇK-së dhe të UÇPMB-së; pra, kemi të përbashkët luftën e fshehtë e të hapur; kemi qenë në çeli të përbashkëta e llogoret e përbashkëta; por që, mjerisht, të përbashkët nuk e kemi atë për të cilën luftuam e që e deshëm më së shumti- lirinë”, ka thënë Xhemajli.
Ai ka shtuar se edhe sot Luginës i mohohen edhe të drejtat elementare kombëtare, e çdo ditë e më shumë shqiptarëve po u ngushtohet mundësia e komunikimit me Kosovën e lirë.
Por gjithësesi, Lugina, ashtu siç e pat të përbashkët të kaluarën, tha ai, duhet dhe do ta ketë të përbashkët edhe të ardhmen.
Ndërkaq, Shaqir Shaqiri, veprimtar i ish Lëvizjes Popullore të Kosovës ka folur për një kronologji të ngjarjeve ku Lugina e Preshevës ishte pjesë e pandashme e zhvillimeve për liri e bashkim kombëtar.
“LPRK-LPK si organizatë e masave ishte shtrirë edhe në Luginën e Preshevës”, ka thënë Shaqiri.
Ai tha se Lugina e Preshevës mbeti territor i pa çliruar dhe forcat serbe kanë vazhduar bë këto hapësira të kryejnë të njëjtat krime që kishin kryer në Kosovë.
Në këtë akademi, u janë ndarë mirënjohje veprimtarëve Jonuz Musliut, Ali Aliut, Ibrahim Fejzullahut, Njazi Kadriut, Xhavit Nuhiut, Xhevat Ajvazit dhe Sadik Jasharit për kontributin që kanë dhënë në Lëvizjen për Çlirim Kombëtar.
