Ka shkuar në 75 numri i të burgosurve të vrarë në luftimet mes grupeve mafioze në tri burgje të Ekuadorit. Ky ishte një ndër incidentet më vdekjeprurëse në burgjet e shtetit të vogël të Amerikës Jugore në vitet e fundit.
Në burgjet ku ndodhën përleshjet e përgjakshme janë dërguar ushtarë dhe policë në përpjekje për ta ndërprerë dhunën që filloi të martën, shkruan BBC, transmeton Gazeta Express.
Ekspertët thonë se luftimet janë nxitur nga beteja për kontroll në burgje, pasi një udhëheqës i grupit mafioz u vra në dhjetor.
Ka raportime se disa policë janë lënduar gjatë përleshjeve, por besohet se të gjithë të vdekurit kanë qenë të burgosur.
Presidenti Lenin Moreno tha se në tri burgjet ku pati luftime janë dërguar përforcime në mënyrë që forcat e sigurisë ta rimarrin kontrollin.
Raportet e para për luftime në burg erdhën rreth orës 9 të mëngjesit të së martës. Shtatë orë më vonë, qeveria tha se forcat e sigurisë e kanë rikthyer rendin në burgun “Guayaquil”.
Besohet se tensionet në burgje kanë qenë të larta që nga vrasja e Jorge Luis Zambrano, i cili ishte udhëheqës i grupit mafioz “Choneros”. Ai u qëllua për vdekje në një kafene pak kohë pas lirimit nga burgu.