Kryetari i Komunës së Drenasit, Ramiz Lladrovci, e ka vlerësuar si shqetësuese mungesën e kryeministrit Albin Kurti në takimin e sotëm të Ambasadës se SHBA-së në Prishtinë.
Ai ka bërë me dije se kryeministri Kurti duhet t`i shpjegon argumentet e tij në secilën tryezë.
Në profilin e tij në “Facebook”, ai ka treguar edhe një mesele për mungesën e Kurtit në këtë takim.
Sipas tij, shefi i ekzekutivit më sa paku vetët në Kosovë.
“Mungesa e Kryeministrit në takimin e ftuar nga Ambasada Amerikane për çështjen e Asociacionit është brengosëse. Sipas sistemit tonë juridik, roli dhe përgjegjësia e Kryeministrit është shumë e rëndësishme, e me theks të veçantë në fushën e negociatave me Serbinë, e ka dhënë verdiktin edhe Gjykata Kushtetuese, sipas të cilës procesi negociator është çështje/përgjegjësi ekskluzive e Kryeministrit. Mospjesëmarrja e Kryeministrit në takimin e sotëm të organizuar nga Ambasada e Shteteve të Bashkuara të Amerikës për të diskutuar për çështjen e Asociacionit, është një mesazh dhe sinjal shqetësues. E kishin pase pyet njërin, o Bac, kush vetet në shpinë tuaj më së shumti, e ai i përgjigjet, të gjithë ngapak, veç Baci hiç”, ka shkruar Lladrovci në profilin e tij në “Facebook”.
Sipas tij, Kosova ose duhet t`i zbatoj marrëveshjet e Brukselit ose t`i shfuqizojë ato.
“Kryeministri, argumentet duhet t’i shtrojë në tryezën e diskutimeve. Edhe Jo-në e Zajednicës (Asociacionit), si njërën nga kauzat me të cilat ka ardhur në pushtet, duhet thënë aty. Janë dy rrugë, të sigurohen numrat e shfuqizohen marrëveshjet, ose fillon procesi i zbatimit të tyre siç ka thënë Gjykata Kushtetuese e qysh po deklarohen partnerët tanë që asociacioni nuk e zhbën karakterin unitar të Kosovës. Kryeministri duhet të dëshmohet më burrështetas se sa kaq. Raportet me ShBA-në janë çështje jetike për qenien tonë. Ato duhet t’i ruajmë si sytë e ballit!”, ka shkruar Lladrovci.