Në Kuvendin e Kosovës dje është miratuar në parim Projektligji për Rimëkëmbje Ekonomike pas pandemisë COVID-19, votimi i të cilit u bë pas gjashtë tentimeve.
Ky projektligj është votuar në seancën e jashtëzakonshme të mbajtur dje, me 64 vota për, asnjë kundër dhe asnjë abstenim. I njëjti kap vlerën e 385 milionë eurove.Një projektligj që votohet në lexim të parë, sipas procedurës së rregullt, i duhen së paku dy javë që të shqyrtohet në komisionet funksionale të kuvendit. Por, epilogun përfundimtar duhet ta jap presidentit i vendit, Hashim Thaçi pas dekretit.
Mirëpo, për njohësin e çështjeve ekonomike, Safet Gërxhaliu, votimi i tij është bërë me vonesë. Përkundër kësaj, ai për GazetaBlic ka theksuar se pritjet nga ky ligj, sipas tij, janë të mëdha.
“Mbështes votimin në lexim të parë të Ligjit për Rimëkëmbje Ekonomike. Duhet theksuar se ligji në fjalë është i vonuar përderisa vendet e rajonit kanë bërë gara se si të ndihmohen qytetarët dhe bizneset. Kosova në këtë drejtim e ka dëshmu një përçarje enorme ekonomike, një dëshmi që në Kosovë luftohet më shumë për pushtet se sa për pushtet. Pritjet janë shumë të mëdha, për vetë faktin se do të hidhet sërish në votim dhe do ketë negocim lidhur me ca ndryshime, besoj që qytetarët të marrin shpresë. Pra, sidoqoftë është mirë të votohet dhe nëse miratohet efekti i parë do jetë rritja e kërkesës agregate, e që kjo do të ishte hapi i parë i fillimit të rimëkëmbjes ekonomike. Duhet të pritet të votohet, të plotësohen kriterat dhe vërtetë atëherë që qytetarët e Kosovës t’i shijoj këto efektet e këtij ligji të degraduar dhe ligj që ka përcarë skajmërisht sistetimin politik në Kosovë”, thotë ai.Në po të njëjtin, është paraparë edhe ai për tërheqje e 10 për qind të kursimeve pensionale në Fondin e Kursimeve Pensionale të Kosovës. Nga Trusti është bërë e ditur se numri i përgjithshëm i kontribut-dhënësve në Trustin Pensional është 639.264.
“Deri në 100 euro kursime i kanë mbi 100 mijë kontribut-dhënës. Mbi 100 deri në 1 mijë euro kursime i kanë mbi 212 mijë kontribut-dhënës, mbi 1 mijë euro kursime deri në 5 mijë i kanë rreth 195 mijë, mbi 5 mijë deri në 10 mijë euro kanë kursimeve mbi 74 mijë, mbi 10 mijë-20 mijë euro kanë 40 mijë kontribut-dhënës dhe mbi 20 mijë euro të kursyera kanë mbi 12.944 kontribut-dhënës”, njofton Trusti.Duhet theksuar se për tërheqjen e dhjetë përqindëshit nga Trusti, nevojitet që Projektligji për rimëkëmbje ekonomike të kalojë në lexim të dytë.
