Ministri i Jashtëm i Vladimir Putinit, Sergei Lavrov është shprehur se katër rajonet e pushtuara nga Rusia në Ukrainë, ku referendumet janë duke u zhvilluar, do të jenë nën “mbrojtjen e plotë” të Moskës nëse aneksohen nga Rusia.

Votimi do të zhvillohet deri të martën në rajonet lindore të Luhanskut dhe Donetsk dhe Kherson dhe Zaporizhzhia në jug nëse duhet t’i bashkohen Rusisë. Lavrov po fliste në një konferencë shtypi pas fjalimit në Asamblenë e Përgjithshme të Kombeve të Bashkuara.

I pyetur nëse Rusia do të kishte arsye për përdorimin e armëve bërthamore për të mbrojtur rajonet e aneksuara të Ukrainës, Lavrov tha se territori rus, duke përfshirë territorin “të sanksionuar më tej” në kushtetutën e Rusisë në të ardhmen, “është nën mbrojtjen e plotë të shtetit”.

“Të gjitha ligjet, doktrinat, konceptet dhe strategjitë e Federatës Ruse zbatohen në të gjithë territorin e saj,” tha ai, duke iu referuar gjithashtu veçanërisht doktrinës ruse për përdorimin e armëve bërthamore.

Ndërkohë Ukraina dhe vendet perëndimore e kanë bërë të qartë se nuk do t’i njohin rezultatet e votimeve.

Ministri i Jashtëm i Ukrainës, Dmytro Kuleba, tha se deklaratat e Rusisë për përdorimin e mundshëm të armëve bërthamore ishin “absolutisht të papranueshme” dhe se Kievi nuk do të dorëzohej para tyre. /abcnews.al/