Policia e Kosovës ka larguar mjetin shpërthyes të gjetur sot në vendin e punimeve ku do të ndërtohet Xhamia e Madhe në qendër të Prishtinës dhe i njëjti është marrë nga Forca e Sigurisë së Kosovës për t’u asgjësuar.
Këtë e ka konfirmuar për Gazetën Online “Reporteri.net”, zëdhënësja e Policisë për rajonin e Prishtinës, Flora Ahmeti.
“Policia e Kosovës e ka larguar mjetin shpërthyes nga vendi i ngjarjes. Ekipet e FSK-së e kanë marrë që ta shkatërrojnë.”, ka thënë Ahmeti.
Në mëngjesin e sotëm janë ndërprerë punimet për ndërtimin e Xhamisë së Madhe në qendër të Prishtinës për shkak se është dyshuar për një mjet shpërthyes.
Në punishten ku janë duke u kryer punimet është parë prezencë e Policisë të Kosovës.
Zëdhënësja e Policisë së Kosovës, Flora Ahmeti, ka thënë se gjatë gërmimeve është gjetur një predhë e vjetër.
“Sot rreth orës 09:30 kemi pranuar informatën për një mjet të dyshimt shpërthyes në rrugën Dëshmorët e kombit në Prishtinë. (dyshohet se është mjet i mbetur para shumë kohësh në atë zonë ) Menjëherë në vendin e ngjarjes kanë dalë njësitet e nevojshme policore të cilat po merren me rastin”, ka thënë Ahmeti.
Ndryshe, Ndërtimi i kësaj xhamie të madhe ka qenë kërkesë e Bashkësisë Islame të Kosovës (BIK) që nga përfundimi i luftës, me argumentimin, se në xhamitë ekzistuese nuk ka vend për falje të besimtarëve mysliman.
Një grup qytetarësh, para pak ditësh, kishin protestuar kundër ndërtimit të xhamisë ku nxiti reagime të shumta.
Xhamia e Madhe që do të ndërtohet në Prishtinë, do të ketë 15 mijë metra katrorë dhe 4 minare. Sipas zyrtarëve të Bashkësisë Islame të Kosovës, brenda objektit të xhamisë do të ketë bibliotekë dhe salla për takime dhe konferenca.
