Pas raportimit të medieve, se një laborator privat po kryen ilegalisht teste për koronavirus, policia i ka zënë derën të martën laboratorit Avicena-ks.

Gazetëa inFokus raporton se  zyrtarë të Krimeve Ekonomike Regjionale së bashku me Inspektoratin Shëndetësor kanë zënë në flagrancë punonjësit e këtij laboratori derisa po kryenin teste ilegalisht, siç tregojnë burime brenda Ministrisë së Shëndetësisë ata kanë hetuar për pesë orë në vendin e ngjarjes deri sa kanë gjetur prova se po kryhen teste për COVID-19 në kundërshtim me ligjin në Kosovë.

Policia e Kosovës nuk e ka mohuar se kanë asistuar në këtë rast me kërkesë të Inspektoratit Shëndetësor të Ministrisë së Shëndetësisë.

“Policia e Kosovës bazuar në detyrat dhe autorizimet policore,  në raste të caktuara kur kërkohet asistencë policore përmes njësiteve të saja iu asiston institucioneve të ndryshme përfshirë ndaj Inspektoratit Shëndetësor të Ministrisë së Shëndetësisë, të cilëve mund t’i referoheni”, thuhet në përgjigjen e tyre.

Ndërsa Inspektorati Shëndetësor nuk kanë dhënë detaje në lidhje me aksionin.

Në medie është  raportuar se laboratori privat Avicena-ks në Prishtinë po kryente ilegalisht teste për Covid-19.

Përmes dëshmitarëve si dhe me dokumente në medie është  raportuar për mënyrën se si po kryhen këto teste e që madje kishte dyshime edhe për vërtetësinë e tyre.

Në Kosovë të drejtë për kryerjen e testeve për Covid-19 ka vetëm Instituti Kombëtar i Shëndetit Publik të Kosovës.