Në një njoftim surprizë, është konfirmuar se Lojërat Olimpike “Los Angeles 2028” do të përfshijnë një event të paprecedentë që nuk është parë kurrë më parë në historinë e Olimpiadave: ceremonia hapëse do të mbahet në dy stadiume të ndryshme – për herë të parë në historinë e Lojërave.

Ngjarja madhështore do të ndahet midis:

Los Angeles Memorial Coliseum – që ka pritur ceremonitë e hapjes më 1932 dhe 1984, dhe SoFi Stadium – një arenë moderne që përdoret nga ekipet NFL, Los Angeles Rams dhe Chargers, dhe që do të presë edhe ndeshje të Botërorit 2026.

Kjo risi vjen mes ndryshimeve të tjera në programin olimpik, ku janë shtuar sporte të reja si:

Cricket – rikthim historik dhe shumë i pritur, veçanërisht me popullaritetin në rritje të këtij sporti në SHBA përmes Major League Cricket.

Flag football, baseball, softball, squash dhe lacrosse – që tashmë janë konfirmuar si pjesë e programit të LA 2028.

Organizatorët njoftuan gjithashtu se përgatitjet nuk janë ndikuar nga zjarret e janarit dhe shkurtit në Kaliforni, duke garantuar se gjithçka po ecën sipas planit.

Një deklaratë zyrtare e LA28 shprehet:

“Dy arenat e jashtëzakonshme do të krijojnë një përvojë të paharrueshme, duke mirëpritur tifozët nga e gjithë bota në Lojëra Olimpike dhe Paralimpike si asnjëherë më parë.”

Ceremonia simbolike e dorëzimit të flamurit olimpik nga Parisi te Los Angelesi gjatë mbylljes së Paris 2024 përfshiu emra si Tom Cruise, Michael Johnson, Billie Eilish dhe Snoop Dogg, duke sinjalizuar nisjen zyrtare të epokës LA 2028. /GazetaExpress/