Kuvendi i Shqipërisë ka publikuar të enjten më 30 qershor projekt-rezolutën e dorëzuar nga shumica qeverisëse për përkujtimin dhe nderimin e viktimave të gjenocidit në Srebrenicë për seancën që do të mbahet më 7 korrik.
Në projekt rezolutën e dorëzuar nga një grup deputetësh të Partisë Socialiste konfirmohet qëndrimi i Shqipërisë se mohimi i gjenocidit të kryer ndaj popullatës boshnjake nga forcat serbe të Bosnjës përbën shkelje të ligjit ndërkombëtar.
Ndër të tjera theksohet se dënohet fuqimisht çdo prirje dhe veprim për të mohuar publikisht me qëllim ose jo, gjenocidin e kryer në Srebenicë, fshehjen e motiveve, lëvdimin e autorëve, ideatorëve dhe mbështetësve të këtij gjenocidi.
Prej shumë vitesh Shqipëria është ndër vendet e pakta që nuk ka miratuar një rezolutë për të dënuar gjenocidin serb në Srebrenicë.
Deputetë të opozitës, mbështetës të ish-kryeministrit Sali Berisha, u përpoqën pa sukses në mesin e muajit maj të përfshinin në punimet e Kuvendit një projekt-rezolutë për Srebrenicën.
Deputetët socialistë u shprehën se nuk mund të pranonin propozime të tilla nga një person i shpallur non grata nga SHBA si i korruptuar dhe minues i demokracisë, dhe i njohur edhe si thyerësi i embargos ndaj Sllobodan Millosheviqit.