Sot në Kuvendin e Kosovës po mbahet seanca ku në rend dite është edhe tërheqja e 30 % të Trustit.
Partitë opozitare kërkuan që projektligji që mundëson këtë të votohet, pos nga ta, edhe nga deputetët e VV-së – partisë në pushtet. Shefja e këtyre të fundit doli kundër.
E ngjashëm edhe kryeministri Albin Kurti.
Ky tha se kanë ndihmuar qytetarët përmes formave tjera dhe se nuk ka nevojë që të tërhiqen 30 % nga Trusti, meqë kështu rrënohet fondi për kursime.
“Afër gjysma e kontributdhënësve nuk do t`i tërheqin as 100 euro. Ne ua kemi dhënë 100 euro tashmë. Unë kam qenë edhe si opozitar si kritik ndaj Trustit, por s`do të thotë se ata e kanë gjithmonë keq. Mirëpo kur edhe FMN-ja po thotë është keq me leju tërheqje, dijeni që është shumë keq. Nismëtarët e kësaj nisme po manipulojnë me varfërinë, ku nuk bëjnë pjesë vetë dhe me qytetarët për të arritur qëllimet e tyre personale. Pensionet nuk janë për tash, por për kohën kur të plakemi. Nuk mund të lejojmë ta humbin të ardhmen, por mos ta fitojmë as të tashmën. Ne mbasemi jemi brezi parë që mund të ketë pleqëri të dinjitetshme”.
Ai pati kritika të ashpra për Bekim Haxhiun, ani pse asnjëherë nuk ia përmendi emrin gjatë fjalimit të tij.
“Të nderuar qytetarë nisma për 30 % nuk është e rastesishme. Ja kush po merret me financa tek ne. Pasojat nuk kemi pse me i bartë ne, por ai deputet. Deputeti, nuk e kam ditë më herët, është doktor shkence në fizoterapi dhe del me një propozim kaq të madh ekonomik. Qeveria nuk e mbështet këtë projektligj”.
Çështja e shumëpërfolur e tërheqjes së 30 për qind nga Trusti ishte në shqyrtim një ditë më parë, por kryeparlamentari Glauk Konjufca mbylli punimet me arsyetimin se ka mungesë kuorumi.