Lajme

Kursim i energjisë, njëra ndër thirrjet me të shpeshta nga zyrtarët

Kursim i energjisë, njëra ndër thirrjet me të shpeshta nga zyrtarët
21:51 | 29 Shtator 2022

Fikja e vetëm një poçi elektrik në vendet ku nuk qëndron ndokush është kursim i energjisë. Këtë praktikë ka filluar të ndjekë Denis Delhysa, qytetar nga Prizreni.

“Po mundohemi me  kursy,  në masë të vogël me përdorë d.m.th vetëm në vendin ku rijmë, në dhomë ku qëndrojmë”, tha Delhysa.

Zyrtarët e Ministrisë së Ekonomisë e kanë një shpjegim për fikjen e dritave në vendet ku nuk është e nevojshme.

“Në qoftë se do të fikej një poç në një familje dhe duke e vlerësuar që ky poç është 40 vat dhe duke llogaritur që janë rreth 300 mijë familje, fuçia e një poçi në të gjitha familjet po të fikej një poç do të ishte 12 mijë kilovat ose 12 MW. 12 MW do të thotë një termocentral prej 12 MW-ve që nënkupton rreth 10% të një termocentrali të “KOSOVA A”, thotë Sabit Gashi nga departamenti i energjisë në Ministri të Ekonomisë.

Gashi thotë se vlera në financa nga fikja e një poçi elektrik me çmimin e importit do të kurseheshin 25.200 euro në ditë, duke e vlerësuar se çmimi mesatar i importit është 300 euro për MW në orë.

Edhe zyrtarët e KEDS-it kanë shpjeguar masat për kursimin e energjisë.

“Sigurisht që gjatë verës dritat janë shumë të rëndësishme, kurse gjatë dimrit dritat janë të rëndësishme por janë dy shpenzuesit kryesor jetik, janë 2 shpenzues tjerë në këtë rast janë ngrohja dhe bojlerët. Në dy rastet kemi të bëjmë me shndërrimin e energjisë elektrike në energji termike”, thotë Viktor Buzhala, zëdhënës i KEDS-it.

Thirrjet për kursim, zëdhënësi Buzhala nuk i ka ndalur kohët e fundit. Të mërkurën ai doli me idenë që edhe pastrimi të bëhet nga dy persona njëkohësisht për të kursyer energji. Por, të enjten zëdhënësi i KEDS-it nuk u është përgjigjur thirrjeve të RTK-së.

OFERTË për Black Friday, Festën e Flamurit dhe Pikën e Re në Petrol Company

Të tjera