Me zhurmë e mospajtime, Kuvendi i Kosovës, javën e kaluar ka votuar dy Komisione Hetimore të cilat do ta hetojnë menaxhimin dhe shtrenjtimin e energjisë.

Njëri komision i iniciuar nga partia më e madhe opozitare, Partia Demokratike e Kosovës, do të jetë për hetimin e menaxhimit të krizës me energjinë për muajt e fundit.

Ndërsa tjetri komision me kërkesë të pushtetit, do të jetë për hetimin e menaxhimit të energjisë që nga viti 2006.

E ky i fundit, do të udhëhiqet nga deputeti i PDK-së, Hajdar Beqa.

Beqa për hetimin e energjisë: Nuk paragjykojmë, do të flasim me argumente

Front Online ka folur me kryesuesin Beqa, i cili tha se ky komision do të vendosë sot se kur do ta filloj punën.

I pyetur nëse mund të dalë ndonjë gjë prej këtij hetimi, ai tha se nuk dëshiron që të paragjykojë, por që ai synon që të jetë një ekip profesional e të flasë vetëm me argumente.

“Realisht besoj që sot vendosim, brenda 14 dite do të konstituohet Komisioni Hetimor. Nuk mund të flasim në këtë fazë. Deri më tani, nuk paragjykojmë, realisht diçka tjetër është deklaratë politike, do të flasim me argumente, ne do të jemi një ekip profesional që do t’i kryejmë punët tona me ligjet, rregulloren e Kuvendit dhe Kushtetutën e Republikës së Kosovës”, tha ai për Front Online.

Ish-drejtori i KEK-ut për hetimin e energjisë: Jam i gatshëm të përgjigjem para çdo institucioni

E, i përfshirë në hetim për energji elektrike që nga viti 2006, mund të jetë edhe Arben Gjukaj, drejtor i Korporatës Energjetike të Kosovës në vitin 2017.

Ai për Front Online tha se është i gatshëm të përgjigjet në rast se thirret nga institucionet, siç thotë ai vetëm për ta ndriçuar të vërtetën.

“Kam qenë, jam dhe do të mbetem i gatshëm para çdo institucioni, që jam i obliguar të përgjigjem, në çdo moment, çka do, me gjithë kapacitetin tim që e kam mu përgjigj, me ndriçuar të vërtetën. Jam i gatshëm, kushdo që më thërret prej institucioneve me u përgjigj”, tha ai për Front Online.

Debati për energjinë elektrike në Kosovë ka nisur që nga fundi i vitit të kaluar, kur Kosova u përballë me reduktime të rrymës, për shkak të një krize globale të energjisë.

Situata më pas u përkeqësua, për shkak se Kosova nuk mund të mbulonte nevojat e saj me kapacitetet prodhuese të KEK-ut.

Ndryshe, sipas ligjeve në fuqi, komisionet hetimore themelohen për të hetuar probleme, çështje ku janë drejtpërsëdrejti të përfshira përgjegjësitë qeveritare apo shtetërore.